საქართველოს ზოგადსაგანმანათლებლო სკოლების ჭადრაკის მასწავლებელთა პირველ ოლიმპიადაში - „ნონა გაფრინდაშვილის თასი“ მონაწილეობის მსურველთათვის რეგისტრაცია დაიწყო

დაიწყო საქართველოს ზოგადსაგანმანათლებლო სკოლების ჭადრაკის მასწავლებელთა პირველ ოლიმპიადაში - „ნონა გაფრინდაშვილის თასი“ მონაწილეობის მსურველთა რეგისტრაცია.

ოლიმპიადა მასწავლებელთა პროფესიული განვითარების ეროვნული ცენტრის ორგანიზებითა და საქართველოს ჭადრაკის ფედერაციასთან თანამშრომლობით გაიმართება.

ოლიმპიადის მიზანია ჭადრაკის პოპულარიზაცია, ჭადრაკის მასწავლებელთა პროფესიული განვითარების ხელშეწყობა და სკოლებში ჭადრაკის სწავლა-სწავლების პროცესის ხარისხიანად წარმართვის მხარდაჭერა.

ოლიმპიადაში მონაწილეობა ნებაყოფლობითია. მონაწილეობის მიღება შეუძლია საქართველოს ზოგადსაგანმანათლებლო სკოლების ყველა მოქმედ ჭადრაკის მასწავლებელს, რომელიც გამოხატავს მონაწილეობის სურვილსა და მზაობას და შეავსებს საგანმანათლებლო რესურსცენტრების მიერ მიწოდებულ სარეგისტრაციო ფორმას.

განაცხადის შევსება სკოლებში 22 სექტემბრიდან დაიწყება და 2026 წლის 5 ოქტომბრის 18:00 საათამდე გაგრძელდება.

ჭადრაკის მასწავლებელთა ოლიმპიადა ორ ეტაპად - რეგიონული და ფინალური ტურნირების სახით ჩატარდება.

ოლიმპიადის რეგიონული ტურნირები მიმდინარე წლის ოქტომბერ-ნოემბერში გაიმართება, სადაც რეგიონის ჩემპიონი ჭადრაკის მასწავლებელი გამოვლინდება.

ფინალური ტურნირი თბილისში ნოემბერ-დეკემბერში გაიმართება. მასში მონაწილეობას რეგიონული ტურნირების 12 გამარჯვებული მასწავლებელი მიიღებს.

ოლიმპიადის ყველა მონაწილე მიიღებს მონაწილეობის დამადასტურებელ ელექტრონულ სიგელს, ხოლო გამარჯვებულები შესაბამისი დიპლომებითა და მედლებით დაჯილდოვდებიან. საქართველოს ჭადრაკის მასწავლებელთა პირველი ოლიმპიადის გამარჯვებულ მასწავლებელს გადაეცემა ოქროს მედალი და ნონა გაფრინდაშვილის თასი.