შალვა პაპუაშვილი: ყველას ხელი მოემართოს იმ საქმეში, რაც საკუთარი ქვეყნისთვის მნიშვნელოვნად მიაჩნიათ, მაგრამ როგორც ჩვენ არ ვერევით ესტონეთის საქმეში, კეთილი ინებონ და ნუ ჩაერევიან საქართველოს შიდა საქმეებში

ყველას ხელი მოემართოს იმ საქმეში, რაც საკუთარი ქვეყნისთვის მნიშვნელოვნად მიაჩნიათ, მაგრამ როგორც ჩვენ არ ვერევით ესტონეთის საქმეში და იმაში, რა კანონს იღებენ, კეთილი ინებონ და ნუ ჩაერევიან საქართველოს შიდა საქმეებში, - განუცხადა პარლამენტის თავმჯდომარემ შალვა პაპუაშვილმა მონტენეგროში ქართველ ჟურნალისტებს.

ჟურნალისტმა ჰკითხა, რას ნიშნავს ესტონეთის გადაწყვეტილება, რომ ესტონეთის პარლამენტმა მიიღო კანონი, რომელიც მესამე ქვეყნების მოქალაქეებს ესტონური პოლიტიკური პარტიების დაფინანსებას უკრძალავს.

„ის დროა ალბათ ესტონეთში დავიწყოთ ვინმეს დაფინანსება. სერიოზულად ამ ხალხთან საუბარი არ შეიძლება. საქმე გვაქვს ადამიანებთან, რომლებსაც საბჭოთა მენტალიტეტი აქვთ. როგორც საბჭოთა კავშირი მსოფლიოში რევოლუციის მოწყობის გეგმებს აწყობდა, სხვა ხალხებზე საუბრობდა, ასე იქცევიან. როგორც ჩანს, ეს მიდგომები არის ესტონეთის მოქმედი ხელისუფლების ერთადერთი რამ, რაც საბჭოთა კავშირიდან წამოიღეს. ყველას ხელი მოემართოს იმ საქმეში, რაც საკუთარი ქვეყნისთვის მნიშვნელოვნად მიაჩნიათ, მაგრამ როგორც ჩვენ არ ვერევით ესტონეთის საქმეში და იმაში, რა კანონს იღებენ, კეთილი ინებონ და ნუ ჩაერევიან საქართველოს შიდა საქმეებში. ჩვენ ჩვენი ადამიანური რესურსიც გვყოფნის, ჭკუაც, გამოცდილებაც, რომ ჩვენი კანონები მივიღოთ და არანაირად არ გვჭირდება ზოგიერთი თავქარიანი უცხოელი პოლიტიკოსის ჩარევა და რეკომენდაციები ჩვენს კანონმდებლობასთან დაკავშირებით“, - აღნიშნა პაპუაშვილმა.