შალვა პაპუაშვილი პარტიების აკრძალვაზე: პოლიტიკურად მიზანშეუწონელია, რომ ანტიკონსტიტუციური პარტია არსებობდეს

პოლიტიკურად მიზანშეუწონელია, რომ ანტიკონსტიტუციური პარტია არსებობდეს, - განაცხადა საქართველოს პარლამენტის თავმჯდომარემ შალვა პაპუაშვილმა ჟურნალისტებთან პარტიების აკრძალვაზე საუბრისას.

მისი თქმით, საკონსტიტუციო სასამართლოსთვის მიმართვა „ქართული ოცნების“ წინასაარჩევნო დაპირება იყო.

„პარტიების აკრძალვასთან დაკავშირებით ჩვენ არანაირი გადაწყვეტილება არც არასდროს მიგვიღია და ვერც ვერასდროს მივიღებთ. ჩვენ გვაქვს მოსაზრება ამასთან დაკავშირებით, რომ კონკრეტული პარტიები არიან ანტიკონსტიტუციური პარტიები და ჩვენი კონსტიტუცია გვეუბნება, რომ თუკი პარტია არის ანტიკონსტიტუციური, ის არ უნდა არსებობდეს. ამიტომ მივმართეთ საკონსტიტუციო სასამართლოს, რომ განსაჯოს ჩვენი და მოსახლეობის უმეტესობის აზრი. საკონსტიტუციო სასამართლოსთვის მიმართვა „ქართული ოცნების“ წინასაარჩევნო დაპირება იყო.

ჩვენ, 1 120 000- მა (მილიონ ას ოცი ათასმა) ადამიანმა მოგვცა მანდატი, რომ მიგვემართა საკონსტიტუციო სასამართლოსთვის. ასე რომ ამ სარჩელის უკან დგას არა „ქართული ოცნების“ ან პარლამენტის გარკვეული წევრები, არამედ 1 120 000 (მილიონ ას ოცი ათას) ადამიანის სარჩელია ეს კონკრეტულ პარტიებთან დაკავშირებით. თუ საკონსტიტუციო სასამართლომ დაადგინა, რომ პარტია არის ანტიკონსტიტუციური, ასეთი პარტია უნდა არსებობდეს?! ვნახოთ სასამართლო ამ მხრივ რა გადაწყვეტილებას მიიღებს“, - აღნიშნა შალვა პაპუაშვილმა.