შარმანაშვილი სარჯველაძის ინტერპელაციაზე ოპოზიციის განცხადებებზე: დიდი ხანია პოლიტიკაში ვარ, ყველანაირი ოპონირება მინახავს, მაგრამ ამას ოპონირებას ვერ დავარქმევ. ეს იყო ზიზღის უკანასკნელი ფორმების ნთხევა

თავდაცვისა და უშიშროების კომიტეტის თავმჯდომარის პირველი მოადგილე „დღის ქრონიკაში“ ჯანდაცვის მინისტრის ინტერპელაციაზე განვითარებულ მოვლენებს გამოეხმაურა. თენგიზ შარმანაშვილმა აღნიშნა, რომ დიუშენის კუნთოვანი დისტროფიის პრეპარატზე საუბრისას, ოპოზიციის წარმომადგენლები ოპონირების ნაცვლად, მიხეილ სარჯველაძის პირად შეურაცხყოფაზე გადავიდნენ.

„დიდი ხანია პოლიტიკაში ვარ, ჯერ კიდევ საბჭოთა პერიოდიდან. ვიყავი მოძრაობაში, რომელიც საბჭოთა კავშირს უპირისპირდებოდა. ყველანაირი ოპონირება მინახავს, მაგრამ ამას ოპონირებას ვერ დავარქმევ. ეს იყო ზიზღის უკანასკნელი ფორმების ნთხევა და რის გამო? რომ თავი დაიმკვიდრონ პოლიტიკაში ასეთი უღირსი მეთოდებით, რომლებსაც სახელსაც კი ვერ ვუძებნი. მიხეილ სარჯველაძე ეკითხებოდა - რომელიმე ჩემი ფრაზა იყო ისეთი, რომელიც სიმართლეს არ შეესაბამებოდა? მაგრამ ჰქონდათ მითითება, რომ არათუ ოპონირება არ გაეწიათ, არამედ პირად შეურაცხყოფაზე გადასულიყვნენ, ოღონდ ეს პოლიტიკური მიზნები აესრულებინათ. აი ასეთ ადამიანებთან გვაქვს საქმე“, - განაცხადა შარმანაშვილმა.

მისივე თქმით, თუ იქნება ოდნავ მაინც ხელჩასაჭიდი მედიკამენტი, რომელიც არ ავნებს ადამიანებს, „ხარჯებს არავინ შეხედავს. რაც არ უნდა დიდი იყოს ხარჯები, სახელმწიფო ამაზე წავა, მაგრამ აქ პირდაპირ ზიანის მიყენების საშიშროებასთან გვაქვს საქმე“.

დეპუტატმა ასევე აღნიშნა, რომ არ შეიძლება ასეთი ადამიანების და მათი ახლობლების პოლიტიკური მიზნებისთვის გამოყენება.