შეღავათები მოქალაქეებისთვის - ვინ თავისუფლდება ქონების გადასახადისგან? „ქრონიკის“ სიუჟეტი

ქონების გადასახადზე ზღვარი 40 000-დან 100 000-მდე იზრდება. ეს ნიშნავს, რომ ფიზიკურ პირებს ქონების გადასახადი მხოლოდ იმ შემთხვევაში დაეკისრებათ, თუ მათი წლიური შემოსავალი 100 000 ლარიდან დაიწყება.

ამ საკანონმდებლო ცვლილებით 81 000 მოქალაქე ქონების გადასახადისგან თავისუფლდება. კანონპროექტზე პარლამენტი და ფინანსთა სამინისტრო ერთობლივად მუშაობენ.

„დღეის მდგომარეობით 81 000 გადამხდელს შეეხება ეს შეღავათი, რომელთა მიერ ბიუჯეტში გადასახდელი თანხა შეადგენდა დაახლოებით, 22 მილიონ ლარს. ცვლილების განხორციელების შემთხვევაში მათ ამ თანხის გადახდა აღარ მოუწევთ, ფიზიკური პირები უკვე წელს მოახერხებენ ამ შეღავათით სარგებლობას", - განაცხადა ფინანსთა მინისტრის მოადგილემ, შემოსავლების სამსახურის უფროსმა მამუკა ბარათაშვილმა.

პარლამენტში ინიციირების შემდეგ კანონმდებლები მას დაჩქარებული წესით განიხილავენ.

ვრცლად იხილეთ მარიამ ბუღაძის სიუჟეტში.