შემოსავლების სამსახურის უფროსმა, მიხეილ მაღლაკელიძემ თბილისში არსებული საბაჟო დეპარტამენტის სტრუქტურული დანაყოფები მოინახულა და ხელმძღვანელ პირებთან სამუშაო შეხვედრა გამართა
ფინანსთა სამინისტროს შემოსავლების სამსახურის უფროსმა, მიხეილ მაღლაკელიძემ, მოადგილესთან, მიხეილ ჩოკოშვილთან და საბაჟო დეპარტამენტის უფროსთან, სოსო ობოლაძესთან ერთად, თბილისში არსებული გაფორმების ეკონომიკური ზონები, მათ შორის ელექტრონული გაფორმების ეკონომიკური ზონა ,,e-გეზი“, საბაჟო გამშვები პუნქტი ,,თბილისის აეროპორტი, ასევე საბაჟო დეპარტამენტის სათაო ოფისი მოინახულა და თანამშრომლებთან სამუშაო შეხვედრა გამართა. ინფორმაციას შემოსავლების სამსახური ავრცელებს.
შეგახსენებთ, ,,ციფრული საბაჟოს“ კონცეფციის ფარგლებში განხორციელებული პროექტი - თბილისის ელექტრონული გაფორმების ეკონომიკური ზონა ,,e-გეზი“ საბაჟო სერვისების გაციფრულებას უკავშირდება და ბიზნესისთვის საბაჟო ფორმალობების ელექტრონული ფორმით მიწოდებას გულისხმობს.
აღსანიშნავია, რომ ბოლო ერთი წლის მონაცემებით, ,,e-გეზი“-ის მებაჟე-ოპერატორების მიერ, დარეგისტრირებულია 153845 საბაჟო დეკლარაცია, რაც საკმაოდ მაღალი მაჩვენებელია და მომსახურების სწრაფად და მარტივად მიღების შესაძლებლობაზე მეტყველებს.
,,თბილისის“ გაფორმების ეკონომიკურ ზონაში ყოფნისას, მიხეილ მაღლაკელიძე პირადად დაესწრო, გაზრდილი ტვირთბრუნვის პირობებში, საქონლის გაფორმებისა და ტვირთების დათვალიერების პროცესს.
,,თბილისის“ გეზ-ში გამართული სამუშაო შეხვედრის ფარგლებში, მიხეილ მაღლაკელიძემ არსებული გამოწვევების ეფექტურად შესრულების პროცესში მჭიდრო კოორდინაციის მნიშვნელობაზე ისაუბრა და ხელმძღვანელი პირებისგან დეტალური ინფორმაცია მოისმინა მიმდინარე და დაგეგმილი პროექტების შესახებ.
როგორც, შემოსავლების სამსახურის უფროსმა აღნიშნა, საქართველოს მასშტაბით სამუშაო შეხვედრები რეგულარული ხასიათის იქნება და აქტიური კომუნიკაცია თანამშრომლებთან მომავალშიც გაგრძელდება.
