შოთა ბერეკაშვილი: ეკონომიკური განვითარების თვალსაზრისით საქართველო კანდიდატ ქვეყნებს შორის ერთ-ერთ მოწინავე ადგილზეა

ეკონომიკური განვითარების თვალსაზრისით საქართველო კანდიდატ ქვეყნებს შორის ერთ-ერთ მოწინავე ადგილზეა, - ასე უპასუხა „ქრონიკასთან“ საუბრისას ეკონომიკური პოლიტიკის საპარლამენტო კომიტეტის თავმჯდომარემ, შოთა ბერეკაშვილმა სალომე სამადაშვილის განცხადებას, რომ ევროკავშირსა და კანდიდატ ქვეყნებს შორის, საქართველო ყველაზე ღარიბი ქვეყანაა.

ბერეკაშვილის თქმით, საქართველოს ეკონომიკის სტაბილურ ზრდას ყველა საერთაშორისო ორგანიზაცია პროგნოზირებს.

„საქართველო კანდიდატ ქვეყნებს შორის ერთ-ერთ მოწინავე ადგილზეა ეკონომიკური განვითარების თვალსაზრისით. ბოლო ოთხი წლის განმავლობაში ნომინალური ანგარიშით საქართველოს ეკონომიკა ერთ სულ მოსახლეზე გაორმაგდა. უფრო მეტიც, უფრო მეტად გაიზარდა. მაგალითისთვის, თუ 2022 წელს ერთ სულ მოსახლეზე შემოსავალი იყო დაახლოებით 4 200 დოლარი, 2025 წლის მონაცემებს რომ დავეყრდნოთ, ეს უკვე 10 200 დოლარს შეადგენს.

ყველა საერთაშორისო ორგანიზაცია, როგორიც არის საერთაშორისო სავალუტო ფონდი, მსოფლიო ბანკი და ა.შ. პროგნოზირებს საქართველოს ეკონომიკის სტაბილურ ზრდას.

აღნიშნული მონაცემები კანდიდატ ქვეყნებს შორის ერთ-ერთი საუკეთესოა“, - აღნიშნა შოთა ბერეკაშვილმა.

მმართველი გუნდი სალომე სამადაშვილს მიზანმიმართულ ტყუილში ადანაშაულებს. „ლელოს“ წევრმა სალომე სამადაშვილმა თქვა, რომ ევროკავშირსა და კანდიდატ ქვეყნებს შორის, საქართველო ყველაზე ღარიბი ქვეყანაა. ხელისუფლება სამადაშვილს საერთაშორისო რეიტინგებს ახსენებს, სადაც საქართველო მოწინავე პოზიციებზეა. მათ შორის, საერთაშორისო სავალუტო ფონდის მონაცემებითაც, საქართველო ეკონომიკური მაჩვენებლით უსწრებს უკრაინასა და მოლდოვას.