შოთა ბერეკაშვილი: გვესმის განცხადებები, რომ ფასდაკლებები ისედაც იყო, ეს ასე არ არის, ჩვენ ამას სისტემური ხასიათი მივეცით
გვესმის განცხადებები, რომ ფასდაკლებები ისედაც იყო, ეს ასე არ არის, ჩვენ ამას სისტემური ხასიათი მივეცით. თქვენ შეგიძლიათ შეხვიდეთ [პორტალზე] და ნახოთ, რომ ის 13 პროდუქტი ყოველდღიურად არის საუკეთესო ფასად, - განაცხადა გადაცემაში “იმედი Live” ეკონომიკური პოლიტიკის საპარლამენტო კომიტეტის თავმჯდომარემ შოთა ბერეკაშვილმა.
მისივე თქმით, საპარლამენტო კომისიამ საერთაშორისო გამოცდილების ფარგლებში რუმინული, ბულგარული, უნგრული, ფრანგული და ბერძნული მოდელები შეისწავლა.
„საბოლოო ჯამში ბერძნულ მოდელზე გავეცით რეკომენდაცია, რადგან ჩვენ ქართული ბაზრის საქციელი შევისწავლეთ, რომელიც ძალიან შეესაბამება ბერძნული ბაზრის საქციელს. სწორედ აქ გაჩნდა იდეა, რომ ბერძნული კალათის ანალოგი დაგვენერგა. ეს აძლევს საშუალებას ბაზარს, სექტორს, რომ მომხმარებელს პროდუქტის კონკრეტულ კატეგორიებზე მუდმივად შესთავაზოს საუკეთესო ფასი“, - განაცხადა ბერეკაშვილმა.
„ქართული ოცნების“ დეპუტატის თქმით, ინიციატივასთან დაკავშირებით ქსელებისგან დადებითი უკუკავშირი იყო.
„ამ შემთხვევაში ჩვენ ვეყრდნობით ბაზრის საქციელს, აქ თამაშში არ შემოდის რეგულაცია. იქ, სადაც რეგულაციებით წავიდნენ გვერდითი ეფექტი მნიშვნელოვნად ნეგატიური იყო, ამან გამოიწვია ფასების ასიმეტრია, ხარჯების გაბერვა, საბოლოო ჯამში ბაზარი დაზარალდა, მომხმარებელმა სხვა პროდუქტებზე გაცილებით მეტი გადაიხადა და შესაბამისად, ინფლაიცია შემცირების ნაცვლად, პირიქით აჩქარდა.
ჩვენი მთავარი გამოწვევა იყო ისე გადაგვეწყო სისტემა, რომ გამოგვეყენებინა ფასდაკლების მოდელი მომხმარებლის სასარგებლოდ. ეს ფასდაკლებები აღარ არის ქაოტური, არის კონკრეტულ კატეგორიაზე დაბალი ფასი, უბრალოდ ხდება ბრენდების როტაცია. არის მიმზიდველი და მაღალი ხარისხის პროდუქტები. ამ სიტუაციით ორივე მხარე იგებს, კერძო სექტორიც და მომხარებელიც“, - განაცხადა შოთა ბერეკაშვილმა.
იმედი
წყარო: imedinews.ge