შსს გვარამიას განცხადებაზე: 166-ე მუხლი არ ითვალისწინებს მოქალაქის მომართვის საჭიროებას სამართალდარღვევაზე რეაგირებისთვის. ქმედების გამოვლენის შემთხვევაში ადმინისტრაციული ორგანო უფლებამოსილია მოახდინოს მასზე რეაგირება
ადმინისტრაციული ორგანო უფლებამოსილია 166-ე მუხლით გათვალისწინებული ქმედების გამოვლენის შემთხვევაში საქართველოს კანონმდებლობით დადგენილი წესით მოახდინოს მასზე რეაგირება, - განუცხადეს „იმედინიუსს“ შინაგან საქმეთა სამინისტროში ნიკა გვარამიას პოსტის პასუხად.
კერძოდ, გვარამიას მიმართ საჯარო სივრცეში, კერძოდ, სოციალურ ქსელ „Facebook“-ში გაკეთებული შეურაცხმყოფელი განცხადების გამო მოქალაქე გიორგი გედენიძე სასამართლომ 2 000 ლარით დააჯარიმა. როგორც ნიკა გვარამიამ სოციალურ ქსელში დაწერა, მედიიდან გაიგო, რომ ვინმე გიორგი გედენიძე მისთვის ფბ-ზე მიყენებული შეურაცხყოფის გამო 2000 ლარით დააჯარიმეს.
როგორც შსს-ში განმარტეს, გიორგი გედენიძე დაჯარიმდა ადმინისტრაციულ სამართალდარღვევათა კოდექსის 166-ე მუხით გათვალისწინებული ქმედებისთვის. კერძოდ, წვრილმანი ხულიგნობისთვის, რაც გულისხმობს საჯარო სივრცეში ლანძღვა-გინებას, მოქალაქეებზე შეურაცხმყოფელ გადაკიდებას და სხვა ამგვარ მოქმედებას, რომელიც არღვევს საზოგადოებრივ წესრიგს ან/და მოქალაქეთა სიმშვიდეს.
„აღნიშნული მუხლი არ ითვალისწინებს მოქალაქის მომართვის საჭიროებას სამართალდარღვევაზე რეაგირებისთვის. ადმინისტრაციული ორგანო უფლებამოსილია ასკ-ის 166-ე მუხლით გათვალისწინებული ქმედების გამოვლენის შემთხვევაში საქართველოს კანონმდებლობით დადგენილი წესით მოახდინოს მასზე რეაგირება“, - განუცხადეს „იმედინიუსს“ შსს-ში.
