Sky News: ევროპული ქვეყნები მსოფლიო ჩემპიონატის ბოიკოტის შესაძლებლობას განიხილავენ, თუ ჯანი ინფანტინო ფიფას წილის კერძო ინვესტორებზე გასხვისების გეგმაზე უარს არ იტყვის

Sky News-ის ინფორმაციით, ევროპული ქვეყნები მსოფლიო ჩემპიონატის ბოიკოტის შესაძლებლობას განიხილავენ, თუ ჯანი ინფანტინო ფიფას წილის კერძო ინვესტორებზე გასხვისების გეგმაზე უარს არ იტყვის.

წყაროს ცნობით, უეფას წევრი ქვეყნები ამ კვირაში რიგგარეშე ონლაინ შეხვედრას გამართავენ, რათა განიხილონ თავიანთი პოზიცია ფიფას მცდელობაზე, გარე ინვესტიციების მოზიდვით ახალი კომერციული კომპანია დააფუძნოს.

მხოლოდ მას შემდეგ, რაც უეფამ არსებულ გეგმებთან დაკავშირებით შეშფოთება საჯაროდ გამოთქვა, ფიფამ დაადასტურა, რომ მისი პრეზიდენტი ჯანი ინფანტინო 20 მილიარდი დოლარის ღირებულების შვილობილი კომპანიის დაფუძნებას გეგმავს. ორგანიზაცია ახალი სტრუქტურის, FIFA Forward Enterprise-ის 20%-ზე მეტის გასხვისებასა და 4.2 მილიარდი დოლარის ინვესტიციის მოზიდვას აპირებს.

აღსანიშნავია, რომ მსოფლიო ჩემპიონატის ფინალის წინა დღეს, ნიუ-იორკში საფეხბურთო ასოციაციებთან გამართულ შეხვედრებზე, ფიფას ამ მნიშვნელოვან სტრატეგიულ გეგმაზე საერთოდ არ უსაუბრია.

ევროპული ფეხბურთის მმართველმა ორგანომ განცხადებაში აღნიშნა: „ეს სცდება ზღვარს, რომელიც ფეხბურთის მმართველმა ინსტიტუტებმა არასდროს არ უნდა გადაკვეთონ. უეფა ამ საკითხს უაღრესად სერიოზულად ეკიდება. ფეხბურთის სული და მართვა არ არის გასაყიდი აქტივი - განსაკუთრებით იმ პირობებში, როდესაც არ არსებობს არანაირი გამჭვირვალობა იმაზე, თუ ვინ იღებს ფინანსურ სარგებელს. არცერთი ჩვენგანი არ არის ფეხბურთის მფლობელი. ის ფიფას საკუთრება არ არის, რომ გაყიდოს“.