Sky News: ფიფამ ევროპული ფეხბურთის მმართველ ორგანოს, უეფას ორგანიზაციის პრეზიდენტის, ჯანი ინფანტინოს დევნასა და „დეზინფორმაციის გავრცელებით“ საპრეზიდენტო არჩევნებზე გავლენის მოხდენის მცდელობაში დასდო ბრალი

ფიფამ ევროპული ფეხბურთის მმართველ ორგანოს, უეფას ორგანიზაციის პრეზიდენტის, ჯანი ინფანტინოს დევნასა და „დეზინფორმაციის გავრცელებით“ საპრეზიდენტო არჩევნებზე გავლენის მოხდენის მცდელობაში დასდო ბრალი.

Sky News-ის მიერ მოპოვებული დოკუმენტების თანახმად, ფიფამ მაიამის სასამართლოს სარჩელით მიმართა. მსოფლიო ფეხბურთის მმართველი უწყება ცდილობს დაბლოკოს უეფას მოთხოვნა იმ მტკიცებულებების გაცემაზე, რომლებიც მსოფლიო ჩემპიონატის წილების კერძო ინვესტორებისთვის მიყიდვის ჩაშლილ მცდელობას უკავშირდება.

„უეფას ქმედებები მოწმობს, რომ მისი განაცხადი არაკეთილსინდისიერია და მიზნად ისახავს ინფანტინოს დევნასა და შევიწროებას“, - აცხადებენ ფიფას იურისტები.

უეფა პროექტ FIFA Forward Enterprise-ის ყველა დოკუმენტის გადაცემას ითხოვს და აცხადებს, რომ შესაძლოა ინფანტინოს წინააღმდეგ სისხლისსამართლებრივი დავა დაიწყოს. ევროპული მხარის მტკიცებით, ინფანტინომ ტურნირები პირადი ფინანსური სარგებლის მისაღებად რეალურ ღირებულებაზე იაფად გაყიდა.

„ყოველგვარი საფუძვლის გარეშე, უეფა მიანიშნებს, თითქოს ინფანტინო აღნიშნული პროექტიდან პირადი გამორჩენის მიღებას ცდილობდა“, - აღნიშნულია ფიფას საპასუხო სარჩელში.

კონფლიქტი მარტში დაგეგმილი ფიფას საპრეზიდენტო არჩევნების წინ გამწვავდა, სადაც ინფანტინო ხელახლა არჩევას გეგმავს. უეფამ მას მხარდაჭერა უკვე მოუხსნა, თუმცა ალტერნატიული კანდიდატი ჯერ არ წარუდგენია.

„არჩევნების წინ უეფამ სასამართლოში განაცხადი შეიტანა და ინფანტინოს შესახებ ცრუ ინფორმაციას ავრცელებს. სასამართლომ უნდა უარყოს ნებისმიერი მცდელობა, რომელიც ამ გზით ფიფას საპრეზიდენტო არჩევნებზე ზემოქმედებას ისახავს მიზნად“, - ნათქვამია ფიფას იურიდიულ მიმართვაში.