სოსიაშვილი პაატა ბურჭულაძის მიმართვაზე: როგორც ჩანს, ციხეში ჯდომა მობეზრდათ. ამ ადამიანებმა, რომლებიც ერის სახელით გამოდიოდნენ, ბევრი ახალგაზრდა გაწირეს ციხისთვის და კეთილი უნდა ინებონ და მოიხადონ სასჯელი, ან დანაშაული აღიარონ და მერე ილაპარაკონ კანონისმიერ შეღავათებზე

ამ ადამიანმა ძალიან მძიმე დანაშაული ჩაიდინა, როდესაც ამ რადიკალებს მოუწოდებდა ქართული სახელმწიფოს წინააღმდეგ, ჩვენი ხელისუფლების დამხობისკენ და მათ პრეზიდენტის სასახლეზე პირდაპირი შტურმი მიიტანეს, - ასე გამოეხმაურა საპარლამენტო უმრავლესობის წევრი, განათლების კომიტეტის თავმჯდომარის მოადგილე, გიორგი სოსიაშვილი პაატა ბურჭულაძის განცხადებას.

სოსიაშვილი თქმით, მათ ჯერ დანაშაული უნდა აღიარონ, იმისთვის რომ „კანონისმიერ შეღავათებზე“ ისაუბრონ.

„როგორც ჩანს, მათ ციხეში მობეზრდათ ჯდომა, ალბათ ეგონათ, რომ დასასვენებელ კურორტზე მოხვდებოდნენ და ამასთან ჩანს, რომ გარე პატრონებმაც აღარ მიაქციეს მათ ყურადღება. ყველაზე ტრაგიკული ის არის, რომ ამ ადამიანებმა, რომლებიც ერის სახელით გამოდიოდნენ, ბევრი ახალგაზრდა გაწირეს ციხისთვის და კეთილი უნდა ინებონ და მოიხადო სასჯელი, ან დანაშაული აღიარონ და მერე ილაპარაკონ კანონისმიერ შეღავათებზე“, - აღნიშნა სოსიაშვილმა.

4 ოქტომბრის საქმეზე დაკავებულმა პაატა ბურჭულაძემ, სასჯელაღსრულების დაწესებულებიდან მიმართვა გაავრცელა. მან ამავე საქმეზე დაკავებულ პირებს მოუწოდა, რომ დათანხმდნენ პროკურატურის მიერ შეთავაზებულ საპროცესო შეთანხმებას, რათა პატიმრობიდან გათავისუფლდნენ.