თამარ იოსელიანი: ძალიან მნიშვნელოვანი დღეა საავიაციო სექტორისთვის, რადგან პირველი პირდაპირი დაკავშირება მოხდება თბილისსა და შანხაის შორის, რომელიც გაზრდის ქვეყნებს შორის დაკავშირებადობას, ხალხთა შორის კავშირს, ტურისტული ნაკადების მოზიდვას და ბიზნესკავშირების გაღრმავებას

დაახლოებით ერთ საათში თბილისის საერთაშორისო აეროპორტში შანხაიდან პირველი რეისი დაეშვება. ძალიან მნიშვნელოვანი დღეა საავიაციო სექტორისთვის, რადგან პირველი პირდაპირი დაკავშირება მოხდება თბილისსა და შანხაის შორის, რომელიც გაზრდის როგორც ქვეყნებს შორის დაკავშირებადობას, შესაბამისად ხალხთა შორის კავშირს, ტურისტული ნაკადების მოზიდვას და ბიზნესკავშირების გაღრმავებას, - განაცხადა ეკონომიკისა და მდგრადი განვითარების მინისტრის მოადგილემ თამარ იოსელიანმა გადაცემაში „დღის ქრონიკა“.

იოსელიანის თქმით, შანხაისა და თბილისს შორის დაკავშირებადობა დაახლოებით 5 საათით მცირდება. მისივე თქმით, ავიამიმოსვლა კვირაში სამი სიხშირით შესრულდება.

„როგორც მოგეხსენებათ შანხაი წარმოადგენს ერთ-ერთ უმსხვილეს ფინანსურ და ეკონომიკურ ცენტრს და დამეთანხმებით, რომ მნიშვნელოვანია ამ ცენტრთან დაკავშირება ჩვენი ქვეყნისთვის“, - აღნიშნა იოსელიანმა.

ამასთან, მინისტრის მოადგილის განცხადებით, წინა წელს 76%-ით გაიზარდა ჩინეთიდან მგზავრთნაკადი, შესაბამისად, ტურიზმის მიმართულებით იყო ხელშესახები შედეგები.