თბილისის საქალაქო სასამართლოში გიგა ავალიანის საქმეზე დაკავებული გიორგი მალანიას პროცესი გაიმართა

თბილისის საქალაქო სასამართლოში გიგა ავალიანის საქმეზე დაკავებული გიორგი მალანიას პროცესი გაიმართა.

ბრალდებული დუმილის უფლებას იყენებს.

სხდომაზე რამდენიმე მოწმე, მათ შორის ნია იმნაძის ჯგუფელები დაკითხეს.

„დღეს დაიკითხნენ გამომძიებლები. რაც შეეხება ჩემს შვილს, კონკრეტული არაფერი უთქვამთ, დაიკითხნენ, ასევე, ნ.ი.-ს ჯგუფელები და დაადასტურეს, რომ არ იცნობდნენ გიორგის“, - განაცხადა გარდაცვლილი მასწავლებლის, გიგა ავალიანის საქმეზე დაკავებულ გიორგი მალანიას მამამ.

„დღევანდელ სასამართლო პროცესზე დაიკითხა 6 მოწმე, მათ შორის 3 იყო მოწმის სტატუსით არსებული პირი, 2 გამომძიებელი და 1 საინფორმაციო ტექნოლოგიური ექსპერტი.

რაც შეეხება ადვოკატის განცხადებას, რომ არცერთ მათგანს გიორგი მალანიას ბრალდებაზე არ მიუთითებია, ასე პირდაპირ და ცალსახად არცერთი მოწმე არ უთითებს ხოლმე ვინმეს ბრალეულობაზე. მოწმე გვაწვდის ინფორმაციას, ჰყვება კონკრეტულს, რაც იცის აღნიშნულ საქმესთან დაკავშირებით და ვინ არის ბრალეული და ვინ არ არის ბრალეული, ამ დასკვნებს აკეთებს სასამართლო“, - განაცხადა პროკურორმა, ქეთი სონიძემ.