თელავში საავტომობილო გზების, მდინარე თელავისხევის კალაპოტისა და ნაკადის დამჭერი ნაგებობების გაწმენდითი სამუშაო მიმდინარეობს

თელავში, სტიქიის სალიკვიდაციო და პრევენციული ღონისძიებების ფარგლებში, საავტომობილო გზების, მდინარე თელავისხევის კალაპოტისა და ნაკადის დამჭერი ნაგებობების გაწმენდითი სამუშაო მიმდინარეობს. ეწყობა ნაპირსამაგრი გაბიონებიც.

კახეთში ინფრასტრუქტურის მინისტრი, გარემოს დაცვისა და სოფლის მეურნეობის მინისტრთან ერთად ჩავიდა. ისინი ადგილზე ეცნობიან სამუშაოებს.

პროექტირებასთან დაკავშირებით გვქონდა შეხვედრა. დამბების სრული რეაბილიტაცია მოხდება, რომ მომავალში დაზღვეული ვიყოთ მსგავსი შემთხვევებისგან. მოეწყობა ბეტონის დამცავი კედლები, ბეტონის დამცავი ძირი, ასევე საფეხმავლო ტროტუარები გაკეთდება მიმდებარე ტერიტორიაზე“, - განაცხადა ინფრასტრუქტურის მინისტრმა, რევაზ სოხაძემ.

„მიმდინარეობს გაწმენდითი სამუშაოები. ძალიან ბევრი სააგენტო აქტიურად არის ჩართული იმისთვის, რომ დროულად მოხდეს იმ საკითხების გადაწყვეტა, რომელიც მნიშვნელოვანია გაწმენდითი სამუშაოების შესასრულებლად“, - აღნიშნა გარემოს დაცვისა და სოფლის მეურნეობის მინისტრმა, დავით სონღულაშვილმა.

„როგორც ხედავთ, საკმაოდ სწრაფად და ოპერატიულად განხორციელდა გაწმენდითი სამუშაოების პირველი ეტაპი. მეორე ეტაპი უწყვეტ რეჟიმში მოიაზრებს პროექტირებას და სარეაბილიტაციო სამუშაოების დაწყებას“, - აღნიშნა სახელმწიფო რწმუნებულმა კახეთის მხარეში, პლატონ კალმახელიძემ.