თელავში სტიქიის სალიკვიდაციო სამუშაოები გრძელდება

თელავში, სტიქიიდან მესამე დღეს, ვითარება კონტროლს ექვემდებარება. მძიმე ტექნიკა 24-საათიანი რეჟიმით მუშაობს. თელავის ხევზე ნაპირსამაგრი სამუშაოები გრძელდება, ხოლო კავკასიონის ქუჩიდან და მიმდებარე ტერიტორიიდან ამ დრომდე ქვა-ღორღი გააქვთ. საგანგებო და ოპერატიული სამუშაოების შედეგად, ქალაქისა და მიმდებარე სოფლების მოსახლეობას ბუნებრივი აირის მიწოდება სრულად აღუდგა. ელექტროენერგია თელავის თითქმის ყველა ქუჩას მიეწოდება. გამონაკლისია კავკასიონის ქუჩა, სადაც, უსაფრთხოების ზომებიდან გამომდინარე, აბონენტებს დენი შეფერხებით მიეწოდებათ.

გუშინ სტიქიის სალიკვიდაციო სამუშაოებში ცოცხალი ძალაც აქტიურად ჩაერთო. დასუფთავების პროცესს შეუერთდნენ „ქართული ოცნების“ ახალგაზრდული ორგანიზაციის წევრები, ასევე კახეთის რეგიონის რვავე მუნიციპალიტეტის საკრებულოებისა და მერიების თანამშრომლები და ხელმძღვანელები.

„გრძელდება გაწმენდითი სამუშაოები. რაც შეეხება, სერვისების მიწოდებას, ელექტროენერგიის მიწოდება აღდგენილია მოსახლეობისთვის. კავკასიონის ქუჩაზე ელექტროენერგიის შეზღუდვა იწყება მაშინ, როდესაც მძიმე ტექნიკა იწყებს მუშაობას. მხოლოდ 10 აბონენტს არ მიეწოდება ბუნებრივი აირი. წყალმომარაგების კუთხით კი აქტიურად მუშაობს კომპანია, იმისთვის, რომ რამდენიმე დაზიანებული მონაკვეთი ეფექტურად აღადგინოს“, - განაცხადა სახელმწიფო რწმუნებულმა კახეთის მხარეში პლატონ კალმახელიძემ.