თენგიზ შარმანაშვილი „იმედთან“ დაკავშირებით ევროპარლამენტის გადაწყვეტილებაზე: ეს არის პირდაპირ დევნა თავისუფალი აზრისა, რომელსაც თითქოს, იცავენ ეს ევროპარლამენტარები და სინამდვილეში თავისუფალი სიტყვის მტრები არიან

თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი ევროპარლამენტის მიერ ტელეკომპანია „იმედისთვის“ ევროპარლამენტში ერთი წლით საქმიანობის შეზღუდვას დევნის დადასტურებულ ფაქტად აფასებს.

„ეს დადასტურებული ფაქტია, რომ ეს არის დევნა. როდესაც ევროპარლამენტარი ამბობს, რომ „ეს არაფერი არ არის და კიდევ პოლიტიკური ძალისხმევა გვაქვს მოფიქრებული, რომ უარესი დაგმართოთ სიტყვის თავისუფლებისთვის თქვენი სამსახურის გამო“, ეს დადასტურებულ ფაქტად შეიძლება, ჩაითვალოს. ამიტომ ეჭვებს თავი დავანებოთ, ეს არის პირდაპირ დევნა თავისუფალი აზრისა, რომელსაც თითქოს, იცავენ ეს ევროპარლამენტარები და სინამდვილეში თავისუფალი სიტყვის მტრები არიან“, - განაცხადა შარმანაშვილმა.

კონკრეტული ევროპარლამენტარები აღიარებენ, რომ ტელეკომპანია „იმედის“ წინააღმდეგ თვეებია, მუშაობენ - პროცესში ჩართული იყო რადიკალებთან დაახლოებული ელენე მეტრეველი, რომელიც „იმედისთვის“ დაწესებულ შეზღუდვას საკუთარ მიღწევად აღიქვამს.

ევროპარლამენტში მუშაობა ტელეკომპანია „იმედს“, „რუსთავი 2“-სა და PosTV-ს 1 წლით აეკრძალათ.