თენგიზ შარმანაშვილი ოპოზიციაზე: გარედან მიღებული დავალების მიუხედავად თავს ვერ იკავებენ, რომ ერთმანეთის მიმართ ეს პიროვნული ზიზღი საჯაროდ არ გამოხატონ
პარლამენტის თავდაცვისა და უსაფრთხოების კომიტეტის თავმჯდომარის პირველმა მოადგილემ თენგიზ შარმანაშვილმა ოპოზიციაში არსებულ შიდა დაპირისპირებაზე „დღის ქრონიკაში“ ისაუბრა.
დეპუტატის თქმით, გარედან მიღებული დავალების მიუხედავად, რადიკალური ოპოზიციის გაერთიანების წევრები თავს ვერ იკავებენ, რომ ერთმანეთის მიმართ პიროვნული ზიზღი საჯაროდ არ გამოხატონ.
„ოპოზიციას ძალიან დიდი შიდა დაუძლეველი პრობლემები აქვს. მიუხედავად იმისა, რომ მათმა პატრონებმა ეს სრულიად ურთიერთშეუთავსებადი ხალხი ერთად შეკრიბა და უბრძანა იქიდან, რომ ახლა ერთად უნდა დასხდეთ და ალიანსი გააკეთოთო, თავსაც კი ვერ იკავებენ, მიუხედავად ამ დავალებისა, რომ ეს პიროვნული ზიზღი ერთმანეთის მიმართ არ გამოხატონ საჯაროდ. თუ ეს ალიანსია და პოლიტიკურ თანამშრომლობას აპირებენ, ხომ ლოგიკური იქნებოდა, რომ შიდა დიალოგი გაემართათ ამ თემებზე, არა პირდაპირ გადავიდნენ ურთიერთშეურაცხყოფაზე. ნამდვილად გეუბნებით, რომ უზრდელობის უკიდურესი ფორმითაც კი გამოუხატავთ მათ საჯარო სივრცეში, ასევე სოციალურ მედიაში ეს. ჩვენს არცერთ წარმომადგენელს თავისი ოპონენტებისათვის ასეთი ფრაზეოლოგია არ უკადრებია და არც მომავალში აკადრებს. ამაზეც კი მიდიან, ამდენად შეუთავსებელი ადამიანები არიან", - აღნიშნა შარმანაშვილმა.
