The New York Times: ევროპულმა ცენტრალურმა ბანკმა ხუთშაბათს საპროცენტო განაკვეთები ბოლო ერთ წელზე მეტი ხნის განმავლობაში ყველაზე მაღალ ნიშნულამდე გაზარდა, რათა ახლო აღმოსავლეთში ომით გამოწვეული ინფლაცია შეაკავოს
ევროპულმა ცენტრალურმა ბანკმა ხუთშაბათს საპროცენტო განაკვეთები ბოლო ერთ წელზე მეტი ხნის განმავლობაში ყველაზე მაღალ ნიშნულამდე გაზარდა, რათა ახლო აღმოსავლეთში ომით გამოწვეული ინფლაცია შეაკავოს. ინფორმაციას ამის შესახებ გამოცემა The New York Times-ი ავრცელებს.
ბანკმა, რომელიც ევროს მომხმარებელი 21 ქვეყნისთვის ადგენს განაკვეთებს, ძირითადი განაკვეთი მეოთხედი პუნქტით, 2.5 პროცენტამდე აწია. ეს უკვე მეორე ზრდაა მას შემდეგ, რაც თებერვალში შეერთებულმა შტატებმა და ისრაელმა ირანს შეუტიეს და ომი დაიწყეს, რამაც გლობალურად ენერგორესურსების ფასები მკვეთრად გააძვირა.
მიმდინარე კვირაში საერთაშორისო ეტალონური ბრენდის ნავთობის ფასმა ერთ ბარელზე ას დოლარს გადააჭარბა, ხოლო ევროპაში ბუნებრივი აირის ფასი ომამდელ მაჩვენებელზე ორჯერ მეტია.
„ახლო აღმოსავლეთის კონფლიქტი ინფლაციურ წნეხს კვლავაც აძლიერებს“, - განაცხადა ცენტრალური ბანკის პრეზიდენტმა, კრისტინ ლაგარდმა ბერლინში გამართულ პრესკონფერენციაზე.
მსოფლიოს წამყვანი ცენტრალური ბანკები იძულებულნი არიან, მზარდ ინფლაციას საპროცენტო განაკვეთების გაზრდით უპასუხონ.
ამასთან, ვითარებას ართულებს ობლიგაციების ბაზარზე არსებული შფოთვა - ინვესტორები წუხან მსოფლიოს უმდიდრესი ქვეყნების მზარდი ვალებისა და გაღრმავებული დეფიციტის გამო. ბოლო კვირებში სახელმწიფო ობლიგაციების ამოსავლიანობამ ბოლო ათ წელზე მეტი ხნის მაქსიმუმს მიაღწია.
იმედი
წყარო: imedinews.ge