The Wall Street Journal-ი ტრამპსა და ნეთანიაჰუს შორის არსებულ რთულ ურთიერთობებზე წერს
ტრამპისა და ნეთანიაჰუს რთული ურთიერთობების კულისებში. სტატიას ამ სათაურით ამერიკული გამოცემა The Wall Street Journal-ი ავრცელებს.
როგორც გამოცემა წერს, ხშირი სატელეფონო საუბრები აშშ-ის პრეზიდენტსა და ისრაელის პრემიერ-მინისტრს შორის, როგორც ჩანს, უკვე ძველებურად მეგობრული აღარ არის.
იმ დროს, როდესაც აშშ-ის პრეზიდენტი დონალდ ტრამპი ირანთან ომის დასრულებისა და მუდმივი შეთანხმების მიღწევას ცდილობდა - კონფლიქტისა, რომელმაც აშშ-ის ეკონომიკაზე უარყოფითად იმოქმედა და საწვავის ფასები ერთ გალონზე 4 დოლარზე მაღლა გაზარდა - მას მკაცრი შენიშვნები ჰქონდა იმ პარტნიორის მიმართ, რომელმაც, მისი აზრით, ომის დაწყებისკენ უბიძგა.
როგორც გამოცემა წყაროებზე დაყრდნობით წერს, ერთ-ერთ ბოლო სატელეფონო საუბარში ტრამპმა ისრაელის პრემიერ-მინისტრ ბენიამინ ნეთანიაჰუსთან ლიბანში განხორციელებული სამხედრო ოპერაციების გამო მიმართა.
„რატომ ანადგურებთ შენობებს? შეწყვიტეთ შენობების აფეთქება“, - განუცხადა ტრამპმა ნეთანიაჰუს.
სხვა საუბარში კი ტრამპმა უკმაყოფილება გამოთქვა იმის გამო, რომ ომით გამოწვეული გლობალური ეკონომიკური ვარდნა, შესაძლოა, ის აშშ-ის ყოფილი პრეზიდენტის ჰერბერტ ჰუვერის და 1930-იანი წლების დიდი დეპრესიის პერიოდთან დააკავშირონ.
ბოლო კვირების განმავლობაში ტრამპისა და ნეთანიაჰუს ურთიერთობაში დაძაბულობამ იმატა. მაშინ, როცა ტრამპი ირანთან კონფლიქტის დასრულებას ცდილობდა, ნეთანიაჰუ სამხედრო ზეწოლის გაგრძელების მომხრე იყო. ამ ურთიერთობას განსაკუთრებული მნიშვნელობა აქვს ახლო აღმოსავლეთისთვის, სადაც შესაძლო სამშვიდობო შეთანხმების პერსპექტივა არსებობს, თუმცა ისრაელის შემდგომმა სამხედრო ოპერაციებმა, შესაძლოა, ეს პროცესი ჩაშალოს.
ისრაელის ოფიციალური პირების განცხადებით, მათთვის მოულოდნელი აღმოჩნდა ხუთშაბათს გამოცხადებული შეთანხმება. მათი შეფასებით, ტრამპი უფრო სამხედრო დარტყმებისკენ იხრებოდა, ვიდრე დიპლომატიური შეთანხმებისკენ. ერთ-ერთი წყაროს ცნობით, ისრაელის ძალები შესაძლო სამხედრო ოპერაციებისთვის მზადყოფნაში იმყოფებოდნენ.
