The Washington Post: გერმანელი ნაციონალისტების დიდმა გამარჯვებამ ევროპის წამყვან პოლიტიკოსებში განგაში გამოიწვია

გერმანელი ნაციონალისტების დიდმა გამარჯვებამ ევროპის წამყვან პოლიტიკოსებში განგაში გამოიწვია - ასე ეხმაურება ამერიკული გამოცემა The Washington Post-ი პარტია „ალტერნატივა გერმანიისთვის“ გამარჯვებას რეგიონულ არჩევნებში.

„დასავლური სამყაროს დედაქალაქებში სერიოზული რყევები გამოიწვია AfD-ის ელვისებურმა ტრიუმფმა. აღნიშნულ რეგიონში დაფიქსირებულმა ამ შედეგმა ცხადყო, რომ პოლიტიკური იდეები, რომლებსაც ოდესღაც უკიდურეს მემარჯვენეობად მიიჩნევდნენ და უგულებელყოფდნენ, ამომრჩევლის ცნობიერებაში უკვე მყარად დამკვიდრდა როგორც პოლიტიკური მეინსტრიმი“, - ნათქვამია სტატიაში.

პოლიტიკური ტენდენცია, რომელსაც AfD წარმოადგენს, აშკარაა არა მხოლოდ ყოფილი აღმოსავლეთ გერმანიის ტერიტორიაზე, არამედ საფრანგეთშიც, სადაც ნაციონალისტური და ანტიმიგრაციული პოლიტიკის მთავარი ფიგურა, მარინ ლე პენი, მომავალი წლის საპრეზიდენტო არჩევნების წინასაარჩევნო გამოკითხვებში რეიტინგით პირველ ადგილზეა.

კვირა საღამოს, გერმანიაში არჩევნების შედეგების გამოქვეყნებასთან ერთად, პრეზიდენტმა დონალდ ტრამპმა, რომლის MAGA მოძრაობასაც მჭიდრო კავშირები აქვს AfD-სთან, ცხადყო, რომ პროცესს თვალს ადევნებდა - მან Truth Social-ზე გამოაქვეყნა ფოტო, სადაც ჩანდა, რომ AfD საგრძნობლად უსწრებდა სხვა პარტიებს, მათ შორის კანცლერ ფრიდრიხ მერცის „ქრისტიან-დემოკრატიულ კავშირს“.

მერცი შეეცადა საზოგადოების დამშვიდებას და განაცხადა, რომ სახელმწიფო ინსტიტუტების სიმტკიცეს საფრთხე არ ემუქრება. ამასთან, მან ხაზგასმით აღნიშნა, რომ CDU „ძველებურ რეჟიმში მუშაობას ვეღარ გააგრძელებს“ და ხელისუფლებას ფუნდამენტური ეროვნული რეფორმებისკენ მოუწოდა.

„რესპუბლიკელმა“ კონგრესმენებმა, მათ შორის სენატორმა მაიკ ლიმ და წარმომადგენელთა პალატის წევრმა, ანა პაულინა ლუნამ AfD-ს გამარჯვება მიულოცეს. ამასთან, მათ მოუწოდეს გერმანიის მთავრობას, თავი შეიკავოს პარტიისა თუ მისი ლიდერების აკრძალვისგან.