The Washington Post: სენატმა მხარი დაუჭირა რეზოლუციას, რომელიც დონალდ ტრამპს ირანთან ომის განახლებას უკრძალავს
სენატმა სამშაბათს მხარი დაუჭირა რეზოლუციას, რომელიც პრეზიდენტ დონალდ ტრამპს ირანთან ომის განახლებას უკრძალავს, რამაც თეთრ სახლთან პოტენციურად დაძაბული დაპირისპირების საფუძველი შექმნა, - წერს გამოცემა The Washington Post-ი.
სენატმა რეზოლუციას 50 ხმით 48-ის წინააღმდეგ დაუჭირა მხარი. კენჭისყრას არ ესწრებოდნენ „რესპუბლიკელი“ სენატორები - მიჩ მაკკონელი და დეივ მაკკორმიკი, რამაც რეზოლუციის მიღების შესაძლებლობა შექმნა.
ეს კენჭისყრა ტრამპსა და „რესპუბლიკელთა“ მიერ კონტროლირებად სენატს შორის მის მეორე საპრეზიდენტო ვადაში არსებულ ერთ-ერთ ყველაზე სერიოზულ უთანხმოებად იქცა. მოვლენები მას შემდეგ განვითარდა, რაც ტრამპის ადმინისტრაციამ ირანთან ომის დასრულების თაობაზე შეთანხმებას მიაღწია. აღნიშნული ნაბიჯი არაერთმა „რესპუბლიკელმა“ სენატორმა მკაცრად გააკრიტიკა ირანული ნავთობისთვის სანქციების მოხსნისა და ირანის აღსადგენად 300 მილიარდი დოლარის ფონდის შექმნის გეგმების გამო.
1973 წლის „ომის უფლებამოსილებების რეზოლუცია“ - კანონი, რომლითაც დემოკრატებმა კენჭისყრის ჩანიშვნა მოითხოვეს - ადგენს, რომ პრეზიდენტმა უნდა გამოიყვანოს აშშ-ის შეიარაღებული ძალები საზღვარგარეთ მიმდინარე საომარი მოქმედებებიდან, თუ კონგრესმა მიიღო შესაბამისი რეზოლუცია, რომელიც კრძალავს კონგრესის თანხმობის გარეშე ჩართულობას.
ტრამპის ადმინისტრაციის განცხადებით, ეს კანონი არაკონსტიტუციურია, ხოლო დებულება, რომელიც კონგრესს უფლებას აძლევს, მიიღოს ომის უფლებამოსილების რეზოლუცია პრეზიდენტის ვეტოს უფლების გარეშე, სამართლებრივად კიდევ უფრო მოწყვლადია.
