The Washington Post: თეთრი სახლი ემზადება ნოემბრის შუალედურ არჩევნებში „დემოკრატების“ მნიშვნელოვანი გამარჯვების ალბათობისთვის

თეთრი სახლის იურიდიული მრჩევლის ოფისი ადმინისტრაციის მიერ პოლიტიკურად დანიშნულ პირებს პირად ბრიფინგებს უტარებს იმის შესახებ, თუ როგორ მოემზადონ უკეთ კონგრესის მხრიდან ზედამხედველობისთვის - ამ თემაზე ინფორმირებული ორი წყაროს თანახმად, პერსონალი ემზადება ნოემბრის შუალედურ არჩევნებში „დემოკრატების“ მნიშვნელოვანი გამარჯვების ალბათობისთვის, - წერს გამოცემა The Washington Post-ი.

დაახლოებით 30-წუთიანი ბრიფინგები მოიცავს PowerPoint-ის პრეზენტაციას იმის შესახებ, თუ როგორ მუშაობს კონგრესის ზედამხედველობა და როგორია მასთან მუშაობის საუკეთესო პრაქტიკა. ამის შესახებ ინფორმაციას ის ორი პირი ავრცელებს, რომლებმაც ანონიმურობის პირობით ისაუბრეს, ვინაიდან საკითხის საჯაროდ განხილვის უფლებამოსილება არ აქვთ.

წყაროების თქმით, იურიდიული მრჩევლის ოფისის თანამშრომლებმა მოუწოდეს პოლიტიკურად დანიშნულ პირებს, სიფრთხილე გამოიჩინონ წერილობითი კომუნიკაციისას და მიაწოდეს მითითებები იმის შესახებ, თუ როგორ უპასუხონ კონგრესის მოთხოვნებს დროულად.

„ყველასთვის აშკარაა, რომ ეს ძალიან სავარაუდოა“, - განაცხადა ერთ-ერთმა ოფიციალურმა პირმა, რომელიც ბრიფინგს დაესწრო.

თეთრი სახლის წარმომადგენელმა, რომელმაც პირადი საუბრების განსახილველად ანონიმურობის პირობით ისაუბრა, განაცხადა, რომ იურიდიული მრჩევლის ოფისი „2025 წლის იანვრიდან აწვდის მითითებებს შესაბამის დაინტერესებულ მხარეებს, რათა უზრუნველყოფილი იყოს ზედამხედველობის მოთხოვნებთან შესაბამისობა და საუკეთესო პრაქტიკის დაცვა“.

თუმცა, ბოლოდროინდელი ბრიფინგები - რომელთაგან ზოგიერთი გასული თვის განმავლობაში ჩატარდა - სრულიად განსხვავებულ კონტექსტში მიმდინარეობს და მათში „შუალედური არჩევნების ძლიერი ქვეტექსტი“ იგრძნობა, - განაცხადა წყარომ.

ზოგიერთმა თანამშრომელმა ეს ბრიფინგები მოსამზადებელ ეტაპად აღიქვა, ტრამპის ადმინისტრაციაში არსებული იმ მზარდი განცდის ფონზე, რომ „რესპუბლიკური პარტია“ სირთულეების წინაშეა და დადგა დრო ყველაზე ცუდი სცენარებისთვის მოსამზადებლად.