თორნიკე ჭეიშვილი: დღეს ყველა ხედავს, კიდევ უფრო ამკაცრებენ, რომ რაიმე ტიპის გვერდის ავლით არ მოხდეს შავი ფულის აშშ-ში შედინება და ისეთი პროცესების განვითარება, როგორსაც ცდილობდნენ, საქართველოში განვითარებულიყო

იურიდიულ საკითხთა საპარლამენტო კომიტეტის თავმჯდომარის პირველი მოადგილე თორნიკე ჭეიშვილი აშშ-ის მიერ უცხოელი აგენტების რეგისტრაციის შესახებ კანონის გამკაცრების ფაქტს გამოეხმაურა.

„როდესაც ჩვენ ვიღებდით აღნიშნულ კანონს საქართველოში, გახსოვთ, მაშინდელი ბაიდენის ადმინისტრაციის კრიტიკული შეფასებები საქართველოსთან მიმართებით, რომ თურმე, ამ კანონის აუცილებლობა არ იყო. დღეს ყველა ხედავს, კიდევ უფრო ამკაცრებენ, რომ რაიმე ტიპის გვერდის ავლით არ მოხდეს შავი ფულის აშშ-ში შედინება და ისეთი პროცესების განვითარება, თუნდაც, როგორსაც ყოველ შემთხვევაში, ცდილობდნენ საქართველოში განვითარებულიყო“, - განაცხადა თორნიკე ჭეიშვილმა.

ცნობისთვის, აშშ-ის სენატის საგარეო ურთიერთობათა კომიტეტმა დაამტკიცა ორპარტიული კანონპროექტი, რომელიც უცხო ქვეყნების, მათ შორის ჩინეთის, რუსეთის, ირანის, ჩრდილოეთ კორეისა და კუბის გავლენის შეზღუდვასა და მათი აგენტების საქმიანობის გამჭვირვალობის გაზრდას ითვალისწინებს.