თორნიკე ფაღავა: ქართველი საზოგადოებისთვის, სახელმწიფოსა და დემოკრატიისათვის ძალიან სასარგებლო თვითმხილების პროცესი მიმდინარეობს რადიკალური ოპოზიციის რიგებში

ქართველი საზოგადოებისთვის, სახელმწიფოსა და დემოკრატიისათვის ძალიან სასარგებლო თვითმხილების პროცესი მიმდინარეობს რადიკალური ოპოზიციის რიგებში, - განაცხადა პარლამენტის პლენარულ სხდომაზე საპარლამენტო უმრავლესობის წევრმა თორნიკე ფაღავამ.

„სულ ახლახან ნიკა გვარამიასგან დადასტურებულად გავიგეთ, რომ წინასაარჩევნოდ „ნაციონალური მოძრაობა“ საპარლამენტო მანდატებს ყიდის და პარტიის ოფისში პოლიტიკური დახლი აქვს მოწყობილი. ეს ნამდვილად არის ქართველი საზოგადოებისა და პირველ რიგში, „ნაციონალური მოძრაობის“ მცირე, მაგრამ მაინც მხარდამჭერების შეურაცხყოფა. ეს კიდევ ერთხელ ადასტურებს იმ ფაქტს, რომ „ნაციონალური მოძრაობა“ საკუთარი ამომრჩევლის ნებით ვაჭრობს და მათთვის ცნება - „საკუთარი ამომრჩეველი და ქართველი საზოგადოების ინტერესი“ არ არსებობს, რაც დამამცირებელია უპირველესად მათი მხარდამჭერებისათვის და მკაფიოდ წარმოაჩენს „ნაციონალური მოძრაობის“ ლიდერების მორალურ სახეს“, - აღნიშნა ფაღავამ. მისივე თქმით, ნიკა გვარამიამ განცხადება გააკეთა ნინო წილოსანთან დაკავშირებით, რომლითაც ის საქართველოს პარლამენტის წევრს პირდაპირ ეთერში დაემუქრა. „სწორედ ამათზეა ნათქვამი - ვერც ვერაფერი დაივიწყეს და ვერც ვერაფერი ახალი ვერ ისწავლეს. ეს ხალხი ძალადობდა მაშინ, როდესაც იყვნენ ხელისუფლებაში, ეს ხალხი ძალადობს ახლა, როდესაც არიან ოპოზიციაში. ეს ხალხი ქართველ საზოგადოებას ჰპირდება ძალადობას იმ შემთხვევაში, თუ სამომავლოდ ხელისუფლებაში მოვლენ. სწორედ ამიტომ ისინი ვერასოდეს დაბრუნდებიან ხელისუფლებაში. სწორედ ამიტომ ისინი ვერასოდეს აიღებენ ძალაუფლებას ხელში და სწორედ ამიტომ ქართველმა საზოგადოებამ ისინი გაუშვა პოლიტიკურ მოუსავლეთში.

საბოლოო ჯამში, ქართველი საზოგადოებისათვის, ქართული სახელმწიფოსა და ქართული დემოკრატიისათვის ძალიან სასარგებლო თვითმხილების პროცესი მიმდინარეობს რადიკალური ოპოზიციის რიგებში. მე დარწმუნებული ვარ, რომ ეს თვითმხილების პროცესი მიგვიყვანს რადიკალური ოპოზიციის თვითგანადგურებამდე“, - აღნიშნა თორნიკე ფაღავამ.