თორნიკე შენგელიას „ბარსელონამ“ ესპანეთის ჩემპიონატის ნახევარფინალური სერია გამარჯვებით დაიწყო, შენგელია კი მატჩის MVP გახდა

ACB ლიგის ნახევარფინალური სერიის სასტარტო შეხვედრაში თორნიკე შენგელიას „ბარსელონამ“ საკუთარ მოედანზე „ტენერიფე“ დამაჯერებლად, ​ანგარიშით 100:67 დაამარცხა.

ქართველი ფორვარდი მატჩის საუკეთესო მოთამაშედ (MVP) დასახელდა. მან მოედანზე სულ რაღაც 17 წუთი და 55 წამი გაატარა. სასტარტო ხუთეულში მყოფმა შენგელიამ ამ დროში 14 ქულა, 7 მოხსნა და 4 პასი მიითვალა. მართალია, ბრისუელამ და იეგომ მასზე მეტი ქულა დააგროვეს, თუმცა შენგელიამ მარგი ქმედების 24-იანი კოეფიციენტით ყველას გადაასწრო, ხოლო როცა მისი ლიდერობით კატალონიელთა უპირატესობამ 20 ქულას გადააჭარბა, მწვრთნელმა ქართველი ლეგიონერი დაასვენა.

„ტენერიფეს“ წევრმა გიორგი შერმადინმა კი გულის არითმიის გამო სეზონი ნაადრევად დაუსრულდა და თავის გუნდს ვერ ეხმარება.

გუნდებს შორის მომდევნო დაპირისპირება ისევ კატალონიაში, 11 ივნისს შედგება, ხოლო 13-ში სერია უკვე კანარის კუნძულებზე გადაინაცვლებს, პარალელურად კი, მეორე ნახევარფინალურ წყვილში „ვალენსიასა“ და „ხუვენტუდს“ შორის პირველი მატჩი დღეს გაიმართება.