თორნიკე სულაბერიძე: ინვესტიციების სააგენტო აქტიურად განაგრძობს ექსპორტისა და ადგილობრივი კომპანიების მხარდაჭერას, რათა მათ მონაწილეობა მიიღონ საერთაშორისო ღონისძიებებში, მათ შორის, ჩინეთში გამართულ CIFTIS-ის გამოფენაზე

მონაწილეებს შესაძლებლობა ექნებათ გაეცნონ საქართველოს საინვესტიციო პოტენციალს, ბიზნესგარემოსა და ტექნოლოგიურ ეკოსისტემას, - განაცხაა ინვესტიციების სააგენტოს დირექტორის მოადგილემ, თორნიკე სულაბერიძემ, რომელიც პეკინში მიმდინარე მომსახურებით ვაჭრობის ჩინეთის საერთაშორისო გამოფენაში (China International Fair for Trade in Services – CIFTIS) მონაწილეობს.

თორნიკე სულაბერიძის განცხადებით, ინვესტიციების სააგენტო ქართულ კომპანიებს საერთაშორისო ბაზრებზე წვდომაში ეხმარება.

„ვიმყოფებით ჩინეთში, ქალაქ პეკინში ერთ-ერთ ყველაზე მასშტაბურ გამოფენაზე, სადაც ინვესტიციების სააგენტოს ორგანიზებითა და ტურიზმის ეროვნული ადმინისტრაციის, ინოვაციებისა და ტექნოლოგიების სააგენტოს და ღვინის ეროვნული სააგენტოს მხარდაჭერით, საქართველო ეროვნული პავილიონით არის წარმოდგენილი. ღონისძიების სტუმრებს შესაძლებლობა ექნებათ დააგემოვნონ ქართული ღვინო, ასევე გაეცნონ საქართველოს საინვესტიციო პოტენციალს, ბიზნესგარემოსა და ტექნოლოგიურ ეკოსისტემას. როგორც სააგენტო, აქტიურად ვაგრძელებთ ექსპორტისა და ადგილობრივი კომპანიების მხარდაჭერას, რათა მათ მონაწილეობა მიიღონ საერთაშორისო ღონისძიებებში, მათ შორის, ჩინეთში გამართულ CIFTIS-ის გამოფენაზე. სამომავლოდ, გლობალურ ასპარეზზე კიდევ ბევრი მსგავსი პროექტის განხორციელებას ვგეგმავთ“ - აღნიშნა თორნიკე სულაბერიძემ.

CIFTIS მომსახურებით ვაჭრობის ერთ-ერთი მნიშვნელოვანი საერთაშორისო პლატფორმაა, რომელიც სახელმწიფო უწყებებს, საერთაშორისო ორგანიზაციებსა და ბიზნესის წარმომადგენლებს აერთიანებს.

წლევანდელი გამოფენის თემაა „გლობალური მომსახურებები, საერთო კეთილდღეობა“. ღონისძიებაში წარმოდგენილია 90 ქვეყანა, რეგიონი და საერთაშორისო ორგანიზაცია, ხოლო ადგილზე მონაწილეობას 1,800-ზე მეტი კომპანია იღებს.