ტრამპი: დღეს, „მშვიდობის საბჭომ“ ისტორიულ შეთანხმებას მიაღწია ღაზაში „ჰამასისა“ და ყველა სხვა შეიარაღებული დაჯგუფების სრული განიარაღების შესახებ - ეს უდიდესი ნაბიჯია მდგრადი მშვიდობისა და უსაფრთხოებისკენ

დღეს, „მშვიდობის საბჭომ“ ისტორიულ შეთანხმებას მიაღწია ღაზაში „ჰამასისა“ და ყველა სხვა შეიარაღებული დაჯგუფების სრული განიარაღების შესახებ - ეს უდიდესი ნაბიჯია მდგრადი მშვიდობისა და უსაფრთხოებისკენ, - განაცხადა აშშ-ის პრეზიდენტმა, დონალდ ტრამპმა.

„ეს შეთანხმება გადამწყვეტი ეტაპია იმისკენ, რომ ღაზის მართვა საბოლოოდ გადავიდეს პალესტინის ახალი მთავრობის ხელში, რომელიც პალესტინელი ხალხის მხარდასაჭერად მჭიდროდ ითანამშრომლებს „მშვიდობის საბჭოსთან“. ამავდროულად, ისრაელს გარანტირებული ექნება კუთვნილი უსაფრთხოება, ღაზა კი აღარასდროს იქცევა ტერორისტული თავდასხმების პლაცდარმად.

ეს არის უმნიშვნელოვანესი ეტაპი „ტრამპის 20-პუნქტიანი გეგმის“ განხორციელების გზაზე. შეთანხმება ეტაპობრივად, მკაცრად გაწერილ ფაზებად შესრულდება. განიარაღების პროცესის დასრულების პარალელურად, ისრაელის ძალები ტერიტორიას დატოვებენ, ხოლო საერთაშორისო სტაბილიზაციის ძალები პალესტინის ახალ პოლიციასთან ერთად იზრუნებენ იმაზე, რომ ღაზა უსაფრთხო იყოს როგორც ადგილობრივი მაცხოვრებლებისთვის, ისე მეზობელი ქვეყნებისთვის.

ერთი წლის წინ იქ სასტიკი ომი მძვინვარებდა, გამწვავებული იყო ჰუმანიტარული კრიზისი და მძევლები გაუსაძლის ტყვეობაში იმყოფებოდნენ. დღეს ჩვენ ისტორიულ პროგრესს მივაღწიეთ, თუმცა წინ კიდევ დიდი სამუშაო გველოდება.

მინდა მადლობა გადავუხადო შუამავლებს - ეგვიპტეს, კატარსა და თურქეთს - გაწეული მნიშვნელოვანი ძალისხმევისთვის, და განსაკუთრებით, ჩემს გამორჩეულ გუნდს, რომლის დაუღალავმა შრომამაც შესაძლებელი გახადა ეს ისტორიული გარღვევა.

იმ საფრთხეს, რომელიც ღაზიდან 7 ოქტომბერს აღმოცენდა, აღდგენის უფლებას არ მივცემთ! ამ შეთანხმებით, ღაზა საბოლოოდ გადავა პალესტინის ახალი მთავრობის ხელში, რომელიც საკუთარ ხალხს ემსახურება. გილოცავთ ყველას ამ უდიდეს მიღწევას, რომელზეც ყველანი ამბობდნენ, რომ შეუძლებელი იყო!“ - აღნიშნა აშშ-ის პრეზიდენტმა.