ტრამპის განცხადებით, ირანთან დადებული ურთიერთგაგების მემორანდუმი „დასრულებულია“

აშშ-ის პრეზიდენტმა დონალდ ტრამპმა ანკარაში მიმდინარე ნატოს სამიტის ფარგლებში ალიანსის გენერალურ მდივანთან მარკ რუტესთან შეხვედრის დროს განაცხადა, რომ, მისი შეფასებით, ირანთან გაფორმებული ურთიერთგაგების მემორანდუმი „დასრულებულია“, მას შემდეგ, რაც რეგიონში დარტყმების სერია განხორციელდა.

„მათთან [ირანელებთან] ურთიერთობას დროის კარგვად ვთვლი“, - განაცხადა ტრამპმა.

ეს ტრამპის მხრიდან ყველაზე მკაფიო მინიშნება იყო, რომ ირანთან მიღწეული შეთანხმება პრაქტიკულად ჩაშლის პირასაა. აშშ-ის პრეზიდენტის ბოლო განცხადებებს წინ უძღოდა ირანის ისლამური რევოლუციის გუშაგთა კორპუსის განცხადება, რომლის მიხედვითაც, ორგანიზაციამ ბაჰრეინსა და ქუვეითში მდებარე აშშ-ის სამხედრო ობიექტებზე იერიში მიიტანა, პასუხად კი აშშ-ის მიერ ირანზე განხორციელებულ დარტყმებს ასახელებდა.

ტრამპმა ირანი „ბოროტ და ავადმყოფ ადამიანებად“ მოიხსენია.

თეთრი სახლის ლიდერმა ირანს „ბინძური მოთამაშეები“ უწოდა ჰორმუზის სრუტეში კომერციულ გემებზე თავდასხმების გამო და განაცხადა, რომ ამით თეირანმა ცეცხლის შეწყვეტის შესახებ შეთანხმება დაარღვია.

ტრამპის თქმით, შეერთებული შტატები დროს კარგავს ირანთან მოლაპარაკებებზე და მას სურს „საქმე ბოლომდე მიიყვანოს“, ნაცვლად იმისა, რომ დიპლომატიური გზის გაგრძელებას შეეცადოს.

„ჩვენ უნდა მოვაშოროთ მათ ეს კიბო. და იცით, რა უნდა გააკეთოთ? კიბო ადრეულ ეტაპზე უნდა ამოკვეთოთ. სწორედ ასე ვგრძნობ თავს“, - აღნიშნა მან.