ტრამპმა უარყო გავრცელებული ინფორმაცია, რომ ურთიერთგაგების მემორანდუმის ფარგლებში აშშ ინვესტიციას ჩადებს ირანის აღდგენის ფონდში, რომლის მოცულობაც 300 მილიარდ დოლარს შეადგენს

აშშ-ის პრეზიდენტმა, დონალდ ტრამპმა უარყო გავრცელებული ინფორმაცია, რომ ურთიერთგაგების მემორანდუმის ფარგლებში აშშ ინვესტიციას ჩადებს ირანის აღდგენის ფონდში, რომლის მოცულობაც 300 მილიარდ დოლარს შეადგენს, და დასძინა, რომ მას არც ყურის ქვეყნებისთვის უთხოვია საინვესტიციო ვალდებულებების აღება.

„თუ გსურთ, შეგიძლიათ განახორციელოთ ინვესტიცია. ანუ, მე რა უნდა ვქნა? ვთქვა, რომ ინვესტირების უფლება არავის აქვს? არა, ჩვენ ინვესტიციას არ ვდებთ, 10 ცენტსაც კი არ ვდებთ. ხალხს შეუძლია გადაწყვიტოს და ასე მოიქცეს, მაგრამ ეს მათი ნებაა“, - განუცხადა ტრამპმა ჟურნალისტებს ეგვიპტის პრეზიდენტ აბდელ ფატაჰ ელ-სისისთან ორმხრივი შეხვედრისას. - „ჩვენ მასში ინვესტიციას არ ვდებთ და არანაირი ფონდი არ გვაქვს“.

კითხვაზე, სთხოვს თუ არა იგი ყურის ქვეყნებს ფონდში ინვესტირებას, ტრამპმა უპასუხა: „არა, არ ვთხოვ, არ ვთხოვ. თუ ამას გააკეთებენ, ძალიან კარგი. მაგრამ ვიტყოდი, რომ გარკვეული პერიოდი ისინი ამას არ იზამენ, სანამ [ირანის] ქცევა არ გაირკვევა. აქ საქმე ქცევას ეხება, თუმცა ჩვენ ინვესტიციას არ ვდებთ“.