წარმომადგენელთა პალატამ მხარი დაუჭირა პრეზიდენტ ტრამპისთვის იმ უფლებამოსილების შეზღუდვას, რომელიც მას ირანის წინააღმდეგ ომის კონგრესის თანხმობის გარეშე გაგრძელების საშუალებას აძლევდა
„რესპუბლიკელების“ მიერ კონტროლირებადმა წარმომადგენელთა პალატამ მხარი დაუჭირა პრეზიდენტ ტრამპისთვის იმ უფლებამოსილების შეზღუდვას, რომელიც მას ირანის წინააღმდეგ ომის კონგრესის თანხმობის გარეშე გაგრძელების საშუალებას აძლევდა. ინფორმაციას ამის შესახებ ამერიკული მედია ავრცელებს.
რეზოლუცია 215 ხმით 208-ის წინააღმდეგ იყო მიღებული, მას მხარი ოთხმა „რესპუბლიკელმაც“ დაუჭირა „დემოკრატებთან“ ერთად. დოკუმენტი პრეზიდენტს ავალდებულებს, გამოიყვანოს აშშ-ის შეიარაღებული ძალები ირანთან საბრძოლო მოქმედებებიდან, თუ ამაზე კონგრესის მკაფიო თანხმობა არ იქნება.
გამონაკლისს წარმოადგენს მხოლოდ ის შემთხვევები, როდესაც საქმე ეხება ამერიკის, მისი მოკავშირის ან პარტნიორის დაცვას „გარდაუვალი თავდასხმისგან“.
წარმომადგენელთა პალატის მიერ სამხედრო უფლებამოსილების შესახებ რეზოლუციის მიღება თავისთავად ომს ვერ დაასრულებს. უამრავი პროცედურული ბარიერის გამო, ამ დოკუმენტის ტრამპის მაგიდამდე მიღწევა საკმაოდ რთული იქნება. თუნდაც ეს მოხდეს, პრეზიდენტს შეუძლია ვეტო გამოიყენოს, ხოლო პალატასა და სენატს ამ დროისთვის აშკარად აკლიათ ხმები იმ ორმესამედიანი უმრავლესობისთვის, რომელიც ვეტოს დასაძლევადაა საჭირო.
