თურქეთის ანტალიის პროვინციაში ტყის ხანძარს ებრძვიან

თურქეთის ანტალიის პროვინციის ქაშის რაიონში, უზუმლუს დასახლებასთან მდებარე ტყის მასივში ხანძარი გაჩნდა. ინფორმაციას თურქული მედია ავრცელებს.

ხანძრის გამომწვევი მიზეზი ჯერჯერობით უცნობია.

შეტყობინების მიღების შემდეგ შემთხვევის ადგილზე ანტალიის სატყეო რეგიონული სამმართველოსა და სახანძრო-სამაშველო სამსახურის ჯგუფები გაემგზავრნენ.

ხანძრის ჩაქრობაში ჩაერთო 6 ვერტმფრენი, 3 თვითმფრინავი, 14 სახანძრო მანქანა, 5 წყლის მიმწოდებელი ავტომობილი, 2 სწრაფი რეაგირების მანქანა და სატყეო სამსახურის 135 თანამშრომელი.

როგორც თურქული მედია იუწყება, ძლიერი ქარის გამო ცეცხლი სწრაფად ვრცელდება. ხანძრის ლოკალიზების მიზნით სამაშველო ჯგუფები სამუშაოებს როგორც საჰაერო, ისე სახმელეთო საშუალებებით აგრძელებენ.