ურსულა ფონ დერ ლაიენი: გუშინ ბელგრადში რატკო მლადიჩის დაკრძალვის კადრები შოკის მომგვრელი იყო

ევროკომისიის პრეზიდენტი ურსულა ფონ დერ ლაიენი ბოსნიელი სერბების არმიის ყოფილი მეთაურის, გენერალ რატკო მლადიჩის დაკრძალვას გამოეხმაურა და აღნიშნა, რომ გუშინ ბელგრადში მისი დაკრძალვის კადრები შოკის მომგვრელი იყო.

როგორც ფონ დერ ლაიენმა სოციალურ ქსელ X-ში დაწერა, მლადიჩი იყო ომის დამნაშავე და ამის გამო მას სამუდამო პატიმრობა ჰქონდა მისჯილი. მან ჩაიდინა გენოციდი და დანაშაული კაცობრიობის წინააღმდეგ.

„გუშინ ბელგრადში რატკო მლადიჩის დაკრძალვიდან გავრცელებული კადრები შოკის მომგვრელი იყო.

რატკო მლადიჩი ომის დანაშაულებისთვის იყო მსჯავრდებული. მას გენოციდზე, ომის დანაშაულებსა და კაცობრიობის წინააღმდეგ ჩადენილ დანაშაულებზე ეკისრება პასუხისმგებლობა. იგი გარდაიცვალა მაშინ, როდესაც სრებრენიცაში ჩადენილი გენოციდისა და სხვა დანაშაულებისთვის სამუდამო პატიმრობის სასჯელს იხდიდა.

დაკრძალვაზე ოფიციალური მხარდაჭერის ნიშნები და ზოგიერთი მაღალი რანგის სერბი ოფიციალური პირის დასწრება ღრმად სამწუხაროა. ეს ცხადყოფს, რომ სათანადოდ ვერ გაიაზრეს და არ დაუპირისპირდნენ ევროპის უახლესი ისტორიის ერთ-ერთ ბნელი პერიოდს, რაც ეწინააღმდეგება იმ ღირებულებებს, რომლებიც სერბეთის ევროკავშირისკენ მიმავალ გზას უდევს საფუძვლად.

ჩვენი თანაგრძნობა ყველა მსხვერპლს იმ დანაშაულებისა, რომლებიც ყოფილ იუგოსლავიაში შემავალ ქვეყნებში იქნა ჩადენილი“, - დაწერა ფონ დერ ლაიენმა.

ცნობისათვის, მლადიჩი 27 აგვისტოს ჰააგის ციხეში 84 წლის ასაკში გარდაიცვალა.

The images from Ratko Mladić’s funeral yesterday in Belgrade were shocking. Ratko Mladić was a convicted war criminal. He was responsible for genocide, war crimes, and crimes against humanity. He died while serving a life sentence for the Srebrenica genocide and other crimes.… — Ursula von der Leyen (@vonderleyen) September 8, 2026