ვატო ქიზიყურაშვილი: საქართველოს მოსახლეობას შეიძლება ძალიან დიდი პრობლემა შეექმნას, თუ გავაგრძელებთ ამ ევროილუზიაში ყოფნას

ევროპამ რეალურად დღეს დაკარგა ის როლი, რაც მას საუკუნეების განმავლობაში ჰქონდა, - განაცხადა „დღის ქრონიკაში“ „ერთიანი ნეიტრალური საქართველოს“ საერთაშორისო მდივანმა ვატო ქიზიყურაშვილმა.

მისივე შეფასებით, ბოლო წლებში ევროპაში მიმდინარე კრიზისმა საქართველოს ბევრ მოქალაქეს დაანახა, რომ ევროატლანტიკური მისწრაფებები არ არის ის გზა, საიდანაც ქვეყანა უნდა მიიწევდეს. მან გააკრიტიკა ინიციატივა იმის შესახებ, რომ ევროკავშირის ახალ წევრებს შესაძლოა აღარ ჰქონდეთ ხმის უფლება, რადგან ეს პირდაპირ ნიშნავს უარს ქვეყნის სუვერენიტეტსა და დამოუკიდებლობაზე.

მან ევროკავშირში არსებულ პრობლემებზე დეტალურად ისაუბრა და აღნიშნა, რომ ყველაზე შემაშფოთებელი ბლოკში მზარდი მილიტარისტული განწყობებია, რამაც შესაძლოა მოგვიანებით საქართველოსაც შეუქმნას პრობლემები.

„ის 78-ე მუხლი და ხელისუფლების მიერ გაცხადებული გეგმა ევროკავშირში 2030 წელს ინტეგრაციის შესახებ, ნაკლებად სავარაუდო და რეალისტურია დღევანდელი მოცემულობით, რადგან ვხედავთ, რომ ევროკავშირში ფუნდამენტური ცვლილებები არ ხდება. პირიქით, სიტუაცია სულ უფრო უარესდება, ეკონომიკური და პოლიტიკური კუთხითაც. ასევე, მზარდი მილიტარისტული განწყობები, რაც შეინიშნება უკვე ევროკავშირის პოლიტიკოსებში, ძალიან შემაშფოთებელია და საქართველოს მოსახლეობას შეიძლება ძალიან დიდი პრობლემა შეექმნას, თუ გავაგრძელებთ ამ ევროილუზიაში ყოფნას“, - აცხადებს ქიზიყურაშვილი.