YouGov-ის მიერ ჩატარებული გამოკითხვის თანახმად, გერმანიაში მმართველი ბლოკის რეიტინგი ისტორიულ მინიმუმამდე დაეცა

ბრიტანული საზოგადოებრივი აზრის კვლევის ინსტიტუტ YouGov-ის მიერ ჩატარებული ბოლო გამოკითხვის თანახმად, გერმანიის მმართველი კონსერვატიული ბლოკის - „ქრისტიან-დემოკრატიული კავშირისა“ და „ქრისტიან-სოციალური კავშირის“ (CDU/CSU) - რეიტინგი ისტორიულ მინიმუმამდე, 18%-მდე დაეცა.

სოციოლოგიური გამოკითხვა 11-დან 14 სექტემბრამდე პერიოდში ჩატარდა და მასში მონაწილეობა 18 წელზე უფროსი ასაკის გერმანიის 2 161-მა მოქალაქემ მიიღო.

აგვისტოს მონაცემებთან შედარებით, CDU/CSU-ის მხარდაჭერა 2 პროცენტული პუნქტით არის შემცირებული.

ამავდროულად, გერმანელ ამომრჩეველში ყველაზე მაღალი პოპულარობით ულტრამემარჯვენე პარტია „ალტერნატივა გერმანიისთვის“ (AfD) სარგებლობს.

საპარლამენტო არჩევნები ახლა რომ ტარდებოდეს, AfD-ს მხარს მოქალაქეთა 29% დაუჭერდა, რაც გასულ თვესთან შედარებით 1 პროცენტული პუნქტით გაზრდილი მაჩვენებელია.