ზარქუა: „ნაცების“ დროს საქართველო იყო პირველ ადგილზე პატიმრების რაოდენობით - 22 ათასზე მეტი პატიმარი ჰყავდათ, 300 000-ზე მეტი ქართველი გამოატარეს იმ პერიოდში ქართულ ციხეებში - ხომ იცით, ციხეები მაშინ რას წარმოადგენდა, ტრაგედიები ტრიალებდა

„ნაცების“ დროს საქართველო იყო პირველ ადგილზე პატიმრების რაოდენობით - 22 ათასზე მეტი პატიმარი ჰყავდათ, - განაცხადა დიასპორის საპარლამენტო კომიტეტის თავმჯდომარემ ირაკლი ზარქუამ.

იგი ასე გამოეხმაურა „ნაციონალური მოძრაობის“ და „ალტ ინფოს“ წევრების განცხადებებს, რომ თითქოს, „ნაციონალური მოძრაობის“ დროს არსებულ პატიმართა რაოდენობას დღეს არსებულმა პატიმრების რაოდენობამ გადააჭარბა.

„ზოგადად, 300 000-ზე მეტი ქართველი გამოატარეს იმ პერიოდში ქართულ ციხეებში და ხომ იცით, ეს ციხეები მაშინ რას წარმოადგენდა, ტრაგედიები ტრიალებდა. რაც შეეხება ამათ მიერ დათვლილს - ვინც ამ პერიოდში დაჯარიმდა, ან ვინც ორთვიანი პატიმრობის შესახებ სასამართლოს გადაწყვეტილებას ელოდებიან, ყველაფერი გააერთიანეს იმიტომ, რომ საზოგადოება ისევ შეიყვანონ შეცდომაში”, - განაცხადა ზარქუამ.

ინფორმაციას, რომ თითქოს საქართველოში 2025 წელს მსჯავრდებულთა საერთო რაოდენობამ 22 767 შეადგინა, განცხადებით გამოეხმაურა სპეციალური პენიტენციური სამსახური. „2025 წლის 31 დეკემბრის მდგომარეობით, პენიტენციურ სისტემაში სასჯელს იხდიდა 8 702 მსჯავრდებული", - აცხადებს პენიტენციური სამსახური.