ზელენსკის განცხადებით, უკრაინელმა სამხედროებმა გვიან ღამით იაროსლავლის ნავთობგადამამუშავებელი ქარხანა და როსტოვში სამხედრო აეროდრომი დაბომბეს

უკრაინის პრეზიდენტმა ვოლოდიმირ ზელენსკიმ „ტელეგრამის“ საკუთარ არხზე დაწერა, რომ უკრაინელმა სამხედროებმა გვიან ღამით რუსეთში იაროსლავლის ნავთობგადამამუშავებელი ქარხანა და როსტოვის სამხედრო აეროდრომი დაბომბეს.

როგორც უკრაინის ლიდერმა აღნიშნა, როსტოვის სამხედრო აეროდრომზე განხორციელებული შეტევის შედეგად დაზიანდა AN-12-ის ტიპის ერთი და AN-26-ის ტიპის ორი თვითმფრინავი და კიდევ სამი ვერტმფრენი.

„მადლობას ვუხდი ჩვენს მებრძოლებს, რომლებიც ყოველდღიურად აგრძნობინებენ რუსეთს ომის შედეგებს. ამ ღამით უკრაინის უსაფრთხოების სამსახურის, სპეციალური ოპერაციების ძალების, თავდაცვის სამინისტროს მთავარი სადაზვერვო სამმართველოსა და საგარეო დაზვერვის სამსახურის ერთობლივი ოპერაციის შედეგად, იერიში მიიტანეს იაროსლავლის ნავთობგადამამუშავებელ ქარხანაზე.

უსაფრთხოების სამსახურმა ასევე ზუსტად იმოქმედა როსტოვში მდებარე სამხედრო აეროდრომზე. დადასტურებულია AN-12-ის ტიპის ერთი, AN-26-ის ტიპის ორი თვითმფრინავისა და კიდევ სამი ვერტმფრენის დაზიანება. კარგი შედეგებია შავ ზღვაზეც. ჩვენ აგრესიას ყოველდღიურად ვპასუხობთ. რუსეთმა მშვიდობა უნდა აირჩიოს“, - დაწერა ზელენსკიმ.