ზვიად გაბისონიამ თურქეთის უმაღლესი განათლების საბჭოს ვიცე- პრეზიდენტთან შეხვედრა გამართა - მხარეებმა საქართველოსა და თურქეთს შორის უმაღლესი განათლების სფეროში არსებული თანამშრომლობა და მისი გაღრმავების პერსპექტივები განიხილეს
საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონია, ანკარაში სამუშაო ვიზიტის ფარგლებში, თურქეთის უმაღლესი განათლების საბჭოს (YÖK) ვიცე-პრეზიდენტ დოქტორ ნაჯიგუნდოღანს შეხვდა. ინფორმაციას განათლების, მეცნიერებისა და ახალგაზრდობის სამინისტრო ავრცელებს.
მხარეებმა საქართველოსა და თურქეთს შორის უმაღლესი განათლების სფეროში არსებული თანამშრომლობა და მისი გაღრმავების პერსპექტივები განიხილეს.
განსაკუთრებული ყურადღება გამახვილდა უნივერსიტეტებს შორის კავშირების გაფართოებასა და აკადემიური პერსონალის და სტუდენტების მობილობის ხელშეწყობაზე.
საუბარი ასევე შეეხო უმაღლესი განათლების ხარისხის განვითარების ხელშეწყობას, საერთაშორისო თანამშრომლობის გაძლიერებასა და უნივერსიტეტებში ინოვაციური საგანმანათლებლო მიდგომების დანერგვის კუთხით ორ ქვეყანას შორის საუკეთესო პრაქტიკის გაზიარებას.
ნაჯიგუნდოღანმა ხაზი გაუსვა საქართველოსთან თანამშრომლობის მნიშვნელობას და გამოხატა მზადყოფნა, თურქეთის უმაღლესი განათლების საბჭომ ხელი შეუწყოს ორ ქვეყანას შორის აკადემიური და სამეცნიერო კავშირების კიდევ უფრო გაძლიერებას.
დასასრულს მხარეებმა აქტიური პარტნიორობის განვითარების მიზნით მუშაობის გაგრძელების მზადყოფნა დაადასტურეს.
შეხვედრას ესწრებოდა საქართველოს საგანგებო და სრულუფლებიანი ელჩი თურქეთის რესპუბლიკაში არჩილ კალანდია.
იმედი
წყარო: imedinews.ge