ზვიად შალამბერიძე: ოპოზიცია არის იმპულსური და არა თანმიმდევრული, თავის განცხადებებშიც და საქციელებშიც. ხშირ შემთხვევაში მათი განცხადებები განსხვავდება მათ მიერ გადადგმული ნაბიჯებისგან
ჩვენ ვუყურებთ, რომ ოპოზიციის ალიანსში არის რამდენიმე ლიდერი, რომელთა განცხადებებიც აბსოლუტურად განსხვავდება ერთმანეთისგან, მაგრამ საბოლოოდ ყველა მუშაობს საქართველოს წინააღმდეგ, - განაცხადა გადაცემაში „დღის ქრონიკა“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ზვიად შალამბერიძემ ოპოზიციაზე საუბრისას.
მისივე თქმით, რასაც ბოლო პერიოდში ვადევნებთ თვალყურს არის ის, რომ ოპოზიცია არის იმპულსური და არა თანმიმდევრული თავის განცხადებებშიც და საქციელებშიც.
„ხშირ შემთხვევაში მათი განცხადებები განსხვავდება მათი გადადგმული ნაბიჯებისგან, ან პირიქით და ამით არის გამოწვეული, რომ დღეს მოვისმინე ოპოზიციის ერთ-ერთი ლიდერის განცხადება, რომ ამაყობს იმით, რომ წინა ხელისუფლების დროს ტრამპი იყო საქართველოში ჩამოსული, რომელიც მომავალში გახდა ამერიკის პრეზიდენტი და მისი კოლეგა გამოდის და ტრამპის ადმინისტრაციას ლანძღავს. აბსოლუტურად აცდენილია ეს ორი რეალობა ერთმანეთისგან. ისინი რა თქმა უნდა ვერანაირად ვერ ჩამოყალიბდნენ და ვერც ჩამოყალიბდებიან საერთო მესიჯზე, რომელიც შეიძლება ქართული საზოგადოებისთვის საინტერესო იყოს და ქართულმა საზოგადოებამ შემდეგ შეიძლება ეს ჯგუფი გარკვეულწილად სერიოზულად აღიქვას.
ისინი ვერც ვერასდროს ააგროვებენ თავიანთ მომხრეებს და ვერც ახლა 26 მაისს მოაგროვებენ. ჩვენ ვხედავთ, რომ ეს არის პერიოდულად მათი თავის გამოჩენის საშუალება, რომ ოპოზიცია არსებობს, ცოცხალია, სულს ღაფავს და ა.შ. ისიც მოვისმინეთ, რომ თურმე „ქართული ოცნების“ მომხრეებზე ორჯერ მეტი მომხრე ჰყავს პოზიციას. ამ ზღაპრებით უნდათ, რომ თავიანთ მომხრეებს დააჯერონ სიცრუე. მილიონ ორასი ათასი ადამიანი თუ ჩვენ გვიჭერდა მხარს, ე.ი. ორი მილიონ ოთხასი ათასი ადამიანი მათი მომხრე უნდა იყოს. შევხედავთ თუ ამ რაოდენობის ადამიანი მოვა ხვალ 7 საათზე და დავინახავთ რეალობა რა არის“, - აღნიშნა ზვიად შალამბერიძემ.
