გახარიას პარტია აქციებთან დაკავშირებული რეპრესიული კანონების გაუქმებას ითხოვს - Netgazeti

პარტია “საქართველოსთვის” გამოდის ინიციატივით, გაუქმდეს ბოლო 2 წლის განმავლობაში აქციებთან დაკავშირებული კანონები. მათი შეფასებით, შეკრებებისა და მანიფესტაციების შესახებ კანონში 2024 წლის შემდეგ შეტანილი ცვლილებები არის გაუმართლებელი ჩარევა გამოხატვის თავისუფლებაში.

პარტიამ მოამზადა კანონპროექტი, რომელსაც პარლამენტში შემდეგ კვირას დააინიციირებენ. როგორც თავად განმარტავენ, კანონპროექტის მიზანია “2024 წლამდე არსებული სამართლებრივი სტატუს-კვოს სრული აღდგენა და დაწესებული ბარიერების აღმოფხვრა, რითაც უზრუნველყოფილი იქნება პროტესტის უფლების ეფექტიანი დაცვა”.

“საქართველოსთვის” განმარტავს, რომ არც 2024 წელს არსებული საკანონმდებლო ჩარჩო მიაჩნიათ იდეალურად. თუმცა აცხადებენ, რომ “ამ სტატუს-კვოსთან დაბრუნებით აღდგება კონსტიტუციური ბალანსი, რაც ახლანდელი მდგომარეობით ცალსახად დარღვეულია”.

ბოლო ორი წლის განმავლობაში მიღებულ რეპრესიულ კანონებზე ანგარიში მოამზადა საქართველოს ახალგაზრდა იურისტთა ასოციაციამ. ორგანიზაციის მონაცემებით, ცვლილებების უმრავლესობა სწორედ შეკრებისა და გამოხატვის თავისუფლების შეზღუდვას ეხება და ისინი პარლამენტმა დაჩქარებული წესით, ანუ 2-3 დღეში მიიღო.

მაგალითად, ზუსტად ერთი წლის წინ, 2025 წლის 2 ივლისს, პარლამენტმა 2-დღეში დაამტკიცა ცვლილებათა პაკეტი, რომლის მიხედვითაც გამკაცრდა ადმინისტრაციულ სამართალდარღვევათა კოდექსი – თუ წვრილმანი ხულიგნობის, პოლიციელისადმი დაუმორჩილებლობის, თანამდებობის პირის შეურაცხყოფის ან შეკრებისა და მანიფესტაციის წესის დარღვევისთვის დაჯარიმებული პირი ჯარიმას არ გადაიხდის, ქმედების განმეორების შემთხვევაში, მას ადმინისტრაციული პატიმრობა შეეფარდება. გარდა ამისა, შეიცვალა გზის გადაკეტვის საქმეებზე ჯარიმების გასაჩივრების წესი და გაიზარდა საგზაო მოძრაობის წესების დარღვევებზე ჯარიმები.

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.წესებსა და პირობებს დეტალურად შეგიძლია გაეცნო მხარდაჭერის პლატფორმაზე.