პროკურატურამ გიორგი ბარამიძის განცხადებაზე გამოძიება სამშობლოს ღალატის მუხლით დაიწყო - Netgazeti

„ნაციონალური მოძრაობის“ ერთ-ერთი ლიდერის, გიორგი ბარამიძის განცხადებასთან დაკავშირებით პროკურატურამ გამოძიება დაიწყო სამშობლოს ღალატის მუხლით. უწყება ამბობს, რომ გამოძიების დაწყებას საფუძვლად დაედო სსიპ ვეტერანების საქმეთა სახელმწიფო სამსახურის განცხადება, „იაგო ხვიჩიას საავტორო გადაცემაში ,,საქართველოს დაბადება“ „ერთიანი ნაციონალური მოძრაობის“ წევრის გიორგი ბარამიძის მიერ აფხაზეთის ომისა და ტყვეთა გაცვლის პროცესის შესახებ გაკეთებულ განცხადებასთან დაკავშირებით“.

გამოძიება საქართველოს სისხლის სამართლის კოდექსის 307-ე პრიმა და 318-ე მუხლით დაიწყო, რაც სამშობლოს ღალატს და საქართველოს სახელმწიფოებრივი ინტერესებისთვის საფრთხის შექმნას გულისხმობს.

უწყება ამბობს, რომ ჩატარდება ყველა საჭირო საგამოძიებო და საპროცესო მოქმედება, რომელთა შედეგების შესახებ საზოგადოებას დამატებით მიაწვდიან ინფორმაცია.

სოციალურ ქსელში გამოძიების დაწყებას გამოეხმაურა ბარამიძეც და დაწერა:

რა თქვა ბარამიძემ?

ორი კვირის წინ YouTube-ზე გამოქვეყნდა იაგო ხვიჩიას გადაცემა „საქართველოს დაბადების“ ეპიზოდი, რომლის სტუმარიც გიორგი ბარამიძე იყო. საუბარი სხვადასხვა თემებს შეეხო, მათ შორის აფხაზეთის ომის დროს ტყვეების გაცვლას.

ბარამიძე: აღარ გვაძლევდნენ ისინი ტყვეებს და ჩვენ ტყვეები არ გვყავდა. ჩვენებს ტყვეები არ აჰყავდათ. ხვიჩია: რატომ ბარამიძე: ხვრეტდნენ ხვიჩია: ჩვენები? ბარამიძე: ჩვენები. ხვიჩია: რატომ იყო ეს აუცილებელი?

ბარამიძე: აუცილებელი არ იყო აბსოლუტურად, რა თქმა უნდა, მაგრამ როცა ადამიანს… ბიძაშვილს მოგიკლავენ, ძმას მოგიკლავენ, მეგობარს მოგიკლავენ, ხო? იქ ემოციის შეკავება ძალიან ძნელია და ახლა მე ისე კი არ ვამბობ, ვინც ხვრეტდა ახლა… ხვიჩია: იქითა მხრიდანაც ხო იგივე ხდებოდა? ბარამიძე: იქ დისციპლინა იყო. იმიტომ, რომ იქ იყო რუსული დისციპლინა. და ისინი იყვანდნენ ტყვეებს. გაცილებით მეტს და იქიდან ბესლან კობახია იყო ჩემი, ასე ვთქვათ, მეორე მხარე, ეგრეთ წოდებული სეპარატისტების მხარე, რუსების მხარე რეალურად, რომელიც მეუბნებოდა, კაი, მე 10-ს მოგცემ, მაგრამ შენ ერთი ხომ უნდა მომცე.

14 საათის წინ ბარამიძემ სოციალურ ქსელში გაავრცელა ვიდეო მიმართვა, სადაც კიდევ ერთხელ განმარტავს მის ნათქვამს. ის ყვება, რომ ომის დაწყების მომენტში საქართველოში მოქმედ ადამიანის უფლებათა დაცვის კომიტეტში იმ სამმართველოს უფროსი იყო, რომელიც პასუხისმგებელი იყო უშუალოდ ადამიანის უფლებების დაცვაზე.

ბარამიძის თქმით, როცა ომი დაიწყო და მტერმა გაგრას შეუტია, ქართველების მხრიდან ტყვეობაში აღმოჩნდა „მეფარიშვილის ბატალიონის“ წევრები.

„რომლებმაც ვაჟკაცურად ბოლომდე იომეს მტერთან და როდესაც ტყვია-წამალი დამთავრდა და უკვე აღარანაირი საშუალება არ ჰქონდათ წინააღმდეგობის გაწევისა, ნუ, მტერმა, მოწინააღმდეგემ ისინი ტყვედ ჩაიგდეს. სხვათა შორის, შემდეგ ამ ადამიანებს ააშენებინეს თავისი ხელით გუდაუთის რაიონში, გუდაუთასთან ახლოს, ტყვეთა საკონცენტრაციო ბანაკი, რომელიც მოგვიანებით მერე მე მოვინახულე. და აქვე გეტყვით, რომ ეს 45-ივე კაცი, მებრძოლი, მე და ჩემმა მოადგილემ, პაატა ზაქარეიშვილმა, ჩვენი მეცადინეობით, წითელი ჯვრის დახმარებით, სამშვიდობოს გამოვიყვანეთ“, – ამბობს ბარამიძე.

ბარამიძის განცხადებით, გადაცემაში ლაპარაკი იყო იმაზე, რომ როდესაც პირველ კვირებში მოწინააღმდეგე მხარე მათ სთხოვდა, რომ ვინმე გადაეცათ, ტყვეები არ ჰყავდათ.

„ნამდვილად მოველოდი, რომ ქოცური მედია რაღაცების, სიტყვებზე დაჭერას და კუდის მობმას დაიწყებდა, მაგრამ განსაკუთრებით საწყენია და ამაღელვებელი, რომ არაქოცურმა საზოგადოებამაც, ნაწილმა არასწორად გაიგო ჩემი ნათქვამი. მით უმეტეს, რომ ბევრს არც აქვს ნანახი ეს ინტერვიუ რეალურად და აი, რაც გავრცელეს ასე ამოგლეჯილად, იმაზე დაიწყეს მსჯელობა, რომ აი, თითქოს მე რომ ვთქვი, რომ ომის პირველ კვირებში, პირველ ხანებში, როდესაც მე ვიყავი დაკავებული ტყვეების გაცვლით და ამ პროცესის დასაწყისში აღმოვაჩინე, რომ ჩვენ არ გვყავდა ტყვეები, ვთქვი, რომ იქითა მხარე, ანუ რუსული მხარე, სეპარატისტული მხარე იყვანდნენ ტყვეებს და ჩვენ არ გვყავდა, იმიტომ რომ ჩვენები ხვრეტდნენ. ეს სიტყვა ვთქვი. ხვრეტდნენ – ეს არ ნიშნავს, რომ ქართული სახელმწიფო ხვრეტს და ეს არ ნიშნავს, რომ ქართული ჯარი და ასე შემდეგ, ხო?! ჩვენ, სამტრო- სასიცოცხლო ბრძოლა გქონდათ მტერთან და უბრალოდ ჩვენებს არა ჰყავდათ ტყვეები. ეს ჩვეულებრივი ამბავია, იქაც ვთქვი, როდესაც ადამიანს მამას მოგიკლავენ, შვილს მოგიკლავენ, ბიძაშვილს მოგიკლავენ, ახლობელს მოგიკლავენ, სულ არ არის გასაკვირი მათგან ასეთი ქმედება, რომ არ დაინდოს მტერი და ეს ჩვეულებრივი ამბავია. ეს არც ქართული ჯარის, რომელიც მაშინ რეალურად არ არსებობდა, ბრალია და მით უმეტეს დანაშაული, რომელზედაც, ასე ვთქვათ, რაღაცას ლაპარაკობენ რომ აი, სადღაც წაგვიყენებენ ამ ამბავს და სადღაც უნდა საქართველოს დაადანაშაულონ თითქოს და არც ქართული სახელმწიფოს, ხო?“.

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.წესებსა და პირობებს დეტალურად შეგიძლია გაეცნო მხარდაჭერის პლატფორმაზე.