სინოდის გაფართოებული კრებისა და ახალი პატრიარქის ინტრონიზაციის თარიღი სავარაუდოდ დღეს გადაწყდება - მეუფე საბა | Rustavi2
"ისტორიული დღეა, დიდი მოლოდინია, ხალხის დიდი ინტერესია, რაც გასაკვირიც არ არის. როგორც იცით, არის ფარული ხმის მიცემის პროცედურა, ამიტომ ვერ ვასახელებთ იმ კანდიდატებს, ვისაც ვაძლევთ ხმას" – განაცხადა მეუფე საბა ინწკირველმა.
მისივე თქმით, დღეს უნდა დასახელდეს პატრიარქობის სამი კანდიდატი და შემდგომ გაფართოებულ კრებაზე იქნება არჩეული ახალი პატრიარქი.
"არაერთი გადაცემა შედგა ამ თემებთან დაკავშირებით, მღვდელმთავრები პასუხობდნენ შეკითხვებს და ამაზე მეტს ვერ გეტყვით. მოლოდინია, მაგრამ პასუხებს გავცემთ კრების შემდგომ, როდესაც კრება დასრულდება", – განაცხადა მეუფე საბამ, როგორც აღნიშნა ამ ეტაპზე უცნობია სინოდის გაფართოებული კრების ჩანიშვნის თარიღი, სადაც პატრიარქი უნდა აირჩიონ.
"თარიღიც, სავარაუდოდ დღეს გადაწყდება და შესაძლებელია, ინტრონიზაციის თარიღიც უკვე დღეს გადაწყდეს", – აღნიშნა მეუფე საბამ.
მედიის კითხვაზე, შეიძლება თუ არა კანდიდატებს შორის მეუფე დანიელი, მეუფე იობი, მეუფე გრიგოლი იყოს დასახელებული, მეუფე საბა ამბობს, რომ ამ კითხვაზე მღვდელმთავრებმა პასუხი უკვე გასცეს.
"ამაზე მეტს ვერაფერს ვიტყვი. სინოდზე იქნება ამაზე მსჯელობა. იმაზე მეტს ვერ გეტყვით, რაც იცით. დასახელდება ყველა, ვინც აკმაყოფილებს კრიტერიუმს. ყველა არის კანდიდატი, შესაძლებელია, დღეს მათ კენჭისყრაში მიიღონ მონაწილეობა. მეუფე დანიელს უსრულდება 71 წელი. უკვე არის ის 70 წლის. წინა სინოდზე იყო ამაზე საუბარი და საბოლოოდ დღეს გაეცემა პასუხი. მე პირადად, ჩემ დამოკიდებულებას გეტყვით, თუმცა მხოლოდ ჩემი დამოკიდებულება არ არის საკმარისი. სინოდის წევრები უნდა შეჯერდნენ ამ თემასთან დაკავშირებით. მე პირადად ვფიქრობ, რომ მას აქვს უფლება, მიიღოს კენჭისყრაში მონაწილეობა", – განაცხადა მეუფე საბამ.