თბილისის მერია ფილტვის კიბოს სკრინინგს სრულად დააფინანსებს - დედაქალაქის მასშტაბით, მოქალაქეებს 16 კლინიკა მოემსახურება | Rustavi2

მწეველები ფილტვის კიბოს განვითარების ყველაზე მაღალი რისკის ჯგუფში შედიან, თუმცა დაავადების ადრეულ ეტაპზე გამოვლენა გამოჯანმრთელების შანსს 70%-ით ზრდის. სწორედ ამ მიზანს ემსახურება თბილისის მერიის ახალი პროგრამა, რომელიც ფილტვის კიბოს სკრინინგის სრულ დაფინანსებას გულისხმობს. დედაქალაქის მასშტაბით, მოქალაქეებს 16 კლინიკა მოემსახურება, რომლებიც კვალიფიციური პერსონალითა და თანამედროვე ტექნიკითაა აღჭურვილი.

თბილისის მერიის ინიციატივით, პროგრამა პირველი მაისიდან ამოქმედდება. უფასო სკრინინგით სარგებლობას თბილისში რეგისტრირებული 45-დან 75 წლამდე ასაკის ის პირები შეძლებენ, ვინც თამბაქოს აქტიური მომხმარებლები არიან ან ვინც ბოლო წლებია აღარ ეწევა. ინიციატივა დაავადებათა სკრინინგის პროგრამის ფარგლებში ხორციელდება და საზოგადოებას, დღეს, დედაქალაქის მერმა გააცნო.

პროგრამის დეტალები ონკოლოგიის, რადიოლოგიისა და პულმონოლოგიის წამყვან სპეციალისტებთან კონსულტაციით შემუშავდა. კვლევა გულისხმობს დაბალდოზირებულ კომპიუტერულ ტომოგრაფიას. დიაგნოზის მაქსიმალური სიზუსტისთვის, შედეგებს ორი რადიოლოგი დამოუკიდებლად შეაფასებს. აზრთა სხვადასხვაობის შემთხვევაში კი, პროცესში მესამე სპეციალისტი ჩაერთვება და კონსილიუმი გაიმართება. დადებითი პასუხის შემთხვევაში, მერია მოქალაქეებს დამატებით პროგრამებსაც შესთავაზებს, რომლებიც მათი მკურნალობასა და მხარდაჭერაზეა ორიენტირებული.

ფილტვის კიბო მსოფლიოში ონკოლოგიური სიკვდილიანობის მიზეზებს შორის პირველ ადგილზეა. დროული დიაგნოსტიკა კი, ამ სტატისტიკის შეცვლისა და სიცოცხლის გახანგრძლივების მთავარი გზაა. ონკოლოგიური დაავადებების პრევენცია და მკურნალობის ხელშეწყობა თბილისის მერიის ერთ-ერთ პრიორიტეტად რჩება, რის გამოც პროგრამები ეტაპობრივად ფართოვდება. წელს, მერიის ჯანდაცვის პროგრამებისთვის 46 მილიონ ლარზე მეტია გამოყოფილი.

ავტორი: ირაკლი კოშაძე