პირველი ფეხბურთელი პსჟ-ს ისტორიაში, რომელსაც ჩემპიონთა ლიგის ერთ სეზონში ყველაზე მეტი შედეგიანი მოქმედება აქვს - რას წერენ მსოფლიო გამოცემები ხვიჩა კვარაცხელიაზე | Rustavi2
დუბლი, წარმატება და მსოფლიო აღიარება - ხვიჩა კვარაცხელიას მორიგი გამორჩეული მატჩი. ნოიერის კარში გატანილი გოლების ხარჯზე, ტაბლოზე ქართული გვარი ორჯერ დაფიქსირდა.
პარიზელებმა ჩემპიონთა ლიგის ნახევარფინალში მიუნხენის "ბაიერნი" 5:4 დაამარცხეს.
მორიგი გასაოცარი პერფორმანსის შემდეგ, კვარაზე მთელი საფეხბურთო სამყარო საუბრობს - ვეტერანი ვარსკვლავები აღტაცებას ვეღარ მალავენ.
25 წლის კვარაცხელიას ბოლოდროინდელი შედეგები იმის დასტურია, რომ საქართველოს ნაკრების ლიდერი ევროპულ ფეხბურთში ერთ-ერთი გამორჩეული ფიგურაა. სწორედ ამიტომ ვეინ რუნი ხვიჩა კვარაცხელიას საუკეთესო ფეხბურთელად უკვე ხმამაღლა აღიარებს.
ეს არ არის ერთადერთი საუკეთესო შეფასება, რომელიც ხვიჩა კვარაცხელიამ ვეტერანი ვარსკვლავისგან მიიღო:
"როცა მას ვუყურებ, ვხედავ გამბედაობას, ინტელექტს, პიროვნებას" - ამბობს ტიერი ანრი, რომლის ყურადღების ცენტრშიც ქართველი ფეხბურთელი სწორედ "ბაიერნთან" გამართული მატჩის შემდეგ მოხვდა.
ხვიჩა კვარაცხელია პირველი ფეხბურთელია "პარი სენ-ჟერმენის" ისტორიაში, რომელსაც ჩემპიონთა ლიგის ერთ სეზონში ყველაზე მეტი შედეგიანი მოქმედება აქვს.
კვარაცხელიას ანგარიშზე, ჩემპიონთა ლიგის მიმდინარე სეზონში უკვე 15 საგოლე მოქმედება - 10 გოლი და 5 შედეგიანი გადაცემაა.
კვარაცხელია მუდმივად ცდილობს ქართველი ქომაგების გაოცებას. წინ არის საპასუხო ნახევარფინალური შეხვედრა "ბაიერნსა" და "პარი სენ-ჟერმენს" შორის, რომელსაც "ალიანს არენა" 6 მაისს უმასპინძლებს.