ანსამბლი, რომელმაც არაერთი თაობა აღზარდა და ქართული ფოლკლორი მსოფლიოს სცენებზე გაიტანა - 140-წლიანი ისტორიის "ერისიონს" საკუთარი შენობა აქვს | Rustavi2

ანსამბლი, რომელმაც არაერთი თაობა აღზარდა, მსოფლიოს სცენებზე ქართული ფოლკლორი გაიტანა და ქართული კულტურის ერთ-ერთ მთავარ სიმბოლოდ იქცა - "ერისიონს" 140-წლიანი არსებობის ისტორიაში პირველად, საკუთარი შენობა აქვს.

4080 კვადრატულ მეტრზე განთავსებული სივრცის სარეკონსტრუქციო-სარეაბილიტაციო სამუშაოები სამი წლის განმავლობაში მიმდინარეობდა.

შენობაში ორი დიდი სარეპეტიციო დარბაზია, მათ შორის ერთი საკონცერტო ფუნქციის, რომელიც 100-მდე მაყურებელს იტევს.

ახალი შენობა სკოლა-სტუდიისთვის განკუთვნილ სამ სარეპეტიციო დარბაზს მოიცავს, სადაც მომზადებას 900-მდე ბავშვი შეძლებს. განთავსებულია მსახიობების საგრიმიოროები, ხმის ჩამწერი სტუდია, ადმინისტრაციული სივრცეები და სასცენო კოსტიუმების საცავები. შენობა ადაპტირებულია შეზღუდული შესაძლებლობის მქონე პირებისთვის.

თანამედროვე სტანდარტებით აღჭურვილი სივრცე, სადაც საუკუნოვანი ანსამბლი მოღვაწეობას გააგრძელებს, დღეს საქართველოს პრემიერ-მინისტრმა ირაკლი კობახიძემ და კულტურის მინისტრმა დაათვალიერეს.

ქართული ხალხური სიმღერისა და ცეკვის სახელმწიფო აკადემიურმა ანსამბლმა მოღვაწეობის ახალი ეტაპი ახალ სივრცეში კონცერტით აღნიშნა. კულტურის სფეროს წარმომადგენლებსა და მოწვეულ სტუმრებს სიმღერისა და ცეკვის გამორჩეული ნომრები წარუდგინა.

"ერისიონი" 1885 წელს შეიქმნა და დღემდე ქართული ფოლკლორის ერთ-ერთ მთავარ მცველად რჩება.

საქართველოს მთავრობისა და კულტურის სამინისტროს მხარდაჭერით, ანსამბლი ამიერიდან საქმიანობას საკუთარ შენობაში გააგრძელებს.

ავტორი: ნინი ნაცვლიშვილი