ზურაბ პატარაძე ბათუმისა და ქობულეთის მუნიციპალიტეტებში სპორტულ ინფრასტრუქტურას გაეცნო | Rustavi2

აჭარის მთავრობის თავმჯდომარე ზურაბ პატარაძე ბათუმისა და ქობულეთის მუნიციპალიტეტებში სპორტულ ინფრასტრუქტურას გაეცნო.

ზურაბ პატარაძემ ბათუმში ანგისის და ლეონიძის ქუჩაზე მდებარე საფეხბურთო ბაზა, ხოლო ქობულეთში რეაბილიტირებული ,,ჩელე არენა“ დაათვალიერა. ასევე, სამუშაო შეხვედრა გაიმართა საფეხბურთო კლუბ „დინამო ბათუმის“ პრეზიდენტთან, თემურ მიქელაძესთან. შეხვედრაზე რეგიონში საფეხბურთო ინფრასტრუქტურის განვითარების და ახალგაზრდებში ფეხბურთის პოპულარიზაციის ხელშეწყობის საკითხები განიხილეს.

ქობულეთში, „ჩელე არენაზე“, აჭარის მთავრობის თავმჯდომარე უმაღლესი საბჭოს თავმჯდომარესთან ცოტნე ანანიძესთან და ვეტერან ფეხბურთელთან რევაზ ჩელებაძესთან ერთად, საფეხბურთო ტურნირის "ჩელეს თასის" პატარა მონაწილეებს გაესაუბრა.

„ქობულეთში, „ჩელე არენაზე“ მნიშვნელოვანი ინფრასტრუქტურული სამუშაოები მიმდინარეობს. უკვე დამონტაჟდა თანამედროვე ტიპის გარე განათება, რაც სტადიონს საშუალებას მისცემს, უმასპინძლოს სხვადასხვა დონის ჩემპიონატებსა და სპორტულ ღონისძიებებს. პარალელურად მიმდინარეობს შიდა სამუშაოები.

ასევე გავეცანით ბათუმის საფეხბურთო ბაზებზე არსებულ მდგომარეობას, გამოწვევებსა და შესაძლებლობებს. მშობლებისა და ახალგაზრდების მხრიდან ფეხბურთის მიმართ ინტერესი ძალიან დიდია, იზრდება გუნდების რაოდენობაც, რასაც შესაბამისი ინფრასტრუქტურული მხარდაჭერა სჭირდება.

ჯანსაღი ცხოვრების წესის ხელშეწყობა და სპორტის განვითარება ჩვენი ერთ-ერთი მნიშვნელოვანი პრიორიტეტია. მზად ვართ, მაქსიმალურად შევუწყოთ ხელი ფეხბურთის პოპულარიზაციას რეგიონში“ - განაცხადა ზურაბ პატარაძემ.

რეაბილიტაციის მეორე ეტაპის ფარგლებში უკვე დამონტაჟდა განათების ბოძები, გაყვანილია ჭაბურღილი და მიმდინარეობს შემოღობვის და შიდა სარემონტო სამუშაოები. რეაბილიტაციის პირველ ეტაპზე შეიცვალა ერთი სტანდარტული და ორი სავარჯიშო მოედნის ხელოვნური საფარი.

ბათუმში, ანგისის საფეხბურთო ბაზაზე ოთხი საფეხბურთო მოედანია განთავსებული. მათ შორის, ამ ეტაპზე ფუნქციონირებს ორი სპორტული მოედანი. პარალელურად დაგეგმილია კიდევ ორი მოედნის მოწყობა. ლეონიძის ქუჩაზე არსებული ორი საფეხბურთო ბაზა 400-ზე მეტ მაყურებელზეა გათვლილი და უკვე მასპინძლობს საფეხბურთო მატჩებს.

აჭარის მთავრობის თავმჯდომარესთან ერთად სპორტული ინფრასტრუქტურა დაათვალიერეს საქართველოს პარლამენტის წევრმა გია ჭყონიამ, აჭარის ეკონომიკის მინისტრმა ედნარ ნატარიძემ, ქალაქ ბათუმის მერმა გიორგი ცინცაძემ, ქობულეთის მუნიციპალიტეტის მერმა ირაკლი ცეცხლაძემ, აჭარის პროექტების მართვის კომპანიის ხელმძღვანელმა ლევან კვანტალიანმა, ასევე ბათუმისა და ქობულეთის მერიისა და საკრებულოს ხელმძღვანელმა პირებმა.