ეს აღარ არის უბრალოდ პოლიტიკური ძალა, ეს არის პოლიტიკურ-რადიკალური დაჯგუფება, რომლის ერთადერთი მიზანია, ახალი დაპირისპირების კერები იყოს სახელმწიფოში - ლევან მახაშვილი | Rustavi2
დაშლის პირას მყოფი "ნაციონალური მოძრაობა" სრული შემადგენლობით დღეს პირველად იკრიბება. პოლიტიკური განხეთქილების ფონზე, ურთიერთბრალდებებისა და შიდა დაპირისპირების პარალელურად, თავმჯდომარეობის კანდიდატებზე, სავარაუდოდ, დღეს დაგეგმილ პოლიტსაბჭოს სხდომაზე იმსჯელებენ. მსჯავრდადებული პრეზიდენტის პარტიის შეკრებას, არ არის გამორიცხული სააკაშვილის რჩეული - ნანუკა ჟორჟოლიანიც დაესწროს, რომელიც "ნაციონალებს" შიდაპარტიულ რევოლუციას ჰპირდება. თინა ბოკუჩავამ ღიად და არაერთხელ თქვა, რომ სააკაშვილზე გაბრაზებულია და უფრო მეტიც, ლიდერი იმპულსური გადაწყვეტილებების გამო პარტიის დაზიანებაშიც დაადანაშაულა.
სააკაშვილის პარტიაში მიმდინარე პროცესი არასერიოზულია სახელისუფლებო გუნდისთვის, სადაც უკვე დიდი ხანია ამბობენ, რომ "ნაციონალურმა მოძრაობამ" პოლიტიკური რესურსი სრულად ამოწურა.
პარლამენტის ევროპასთან ინტეგრაციის კომიტეტის თავმჯდომარის, ლევან მახაშვილის განცხადებით, "ნაციონალური მოძრაობა" რადიკალიზაციის გზას ადგას და მისი მიზანი ქვეყანაში ახალი დაპირისპირების კერების შექმნაა.
"ყველაფერი არის ძალიან ნათელი, რომ ეს პარტია საბოლოოდ უკვე უკან დასაბრუნებელი გზის გარეშე გადაეშვა რადიკალიზაციის პროცესში. ეს აღარ არის უბრალოდ პოლიტიკური ძალა, ეს არის ჩვეულებრივი პოლიტიკურ-რადიკალური დაჯგუფება, რომლის ერთადერთი მიზანი არის, რომ რაც შეიძლება რაღაც ახალი დაპირისპირების კერები იყოს სახელმწიფოში. ამიტომ, საინტერესო ნამდვილად არ არის მოსახლეობისთვის, ერთადერთი, ჩვენ ადრეც გვითქვამს, რამდენადაც არის ჩვენთვის საინტერესო, იმედია რაც შეიძლება მალე მოხდება ამ პოლიტიკური დაჯგუფების გაწევა პოლიტიკური სივრციდან, რაც მხოლოდ და მხოლოდ წაადგება ქართული დემოკრატიის განვითარებას", - აცხადებს პარლამენტის ევროპასთან ინტეგრაციის კომიტეტის თავმჯდომარე ლევან მახაშვილი.
რუსთავი 2
წყარო: rustavi2.ge