თბილისის საქალაქო სასამართლოში ლევან ჯანგველაძის შეკვეთით განზრახ მკვლელობის ორგანიზებაში ბრალდებული ოთარ რომანოვ-ფარცხალაძის სასამართლო პროცესი მიმდინარეობს
თბილისის საქალაქო სასამართლოში ლევან ჯანგველაძის შეკვეთით განზრახ მკვლელობის ორგანიზებაში ბრალდებული ოთარ რომანოვ-ფარცხალაძის სასამართლო პროცესი მიმდინარეობს. დღეს იმართება წინა სასამართლო სხდომა, რომელზეც მტკიცებულებების დასაშვებობაზე იმსჯელებენ.
"დღეს გვაქვს წინასასამართლო სხდომა, სადაც განვიხილავთ მტკიცებულებების დასაშვებობის საკითხს, მათ შორის, აღკვეთის ღონისძიების სახით პატიმრობის ძალაში დატოვების საკითხს და გადაეცემა თუ არა საქმე არსებით განსახილველად. ბრალდების მხარეს მიაჩნია, რომ საქმეში წარმოდგენილი მტკიცებულებები, მათ შორის, ყველა ის მოწმის ჩვენება, წერილობითი მტკიცებულებები, დამატებით გამოთხოვილი იქნა ოთარ რომანოვ-ფარცხალაძის საბანკო ანგარიშები, გამოთხოვილი იქნა მისი მობილური ტელეფონზე დეტალური ინფორმაცია, დათვალიერებულია და საქმეშიც არის წარმოდგენილი, ვფიქრობთ რომ ეს მტკიცებულებები და სხვა მტკიცებულებებთან ერთობლიობაში ქმნის იმ საფუძველს რომ ბრალდებულის მიმართ დადგება გამამტყუნებელი განაჩენი," - აცხადებს საქმის პროკურორი ლევან ვეფხვაძე.
შეგახსენებთ, რომ ოთარ რომანოვ-ფარცხალაძეს ბრალი წარდგენილი აქვს მუხლით, რაც შეკვეთით და ანგარებით განზრახ მკვლელობის ორგანიზებას გულისხმობს. დანაშაული 16-იდან 20-წლამდე ან უვადო თავისუფლების აღკვეთას ითვალისწინებს. ოთარ რომანოვ-ფარცხალაძე რუსეთის მოქალაქეა, მის მიმართ საერთაშორისო ძებნაა გამოცხადებული.
რუსთავი 2
წყარო: rustavi2.ge