"თუ მოვლენები ისე განვითარდა, როგორც ამას ამჟამინდელი გამოკითხვები აჩვენებს, ამ რეგიონს სერიოზული პრობლემები შეექმნება" - ფრიდრიხ მერცი
გერმანიაში სექტემბერში ადგილობრივი არჩევნები გაიმართება. წინასწარი გამოკითხვებით, მთავარი ოპოზიციური პარტია "ალტერნატივა გერმანიისთვის" ქვეყნის ერთ-ერთ უმსხვილეს რეგიონში, საქსონია ანჰალტის ადმინისტრაციულ ერთეულში ლიდერობს.
გერმანიის კანცლერი ოპოზიციის რეიტინგს სახიფათოდ მიიჩნევს და აცხადებს, რომ იმ შემთხვევაში, თუ ოპოზიცია გაიმარჯვებს, რეგიონი უცხოელი ინვესტორების გარეშე დარჩება. მერცი ოპონენტებთან პოლიტიკურ ბრძოლას აანონსებს.
"მინდა ძალიან მკაფიოდ ვთქვა: თუ მოვლენები ისე განვითარდა, როგორც ამას ამჟამინდელი გამოკითხვები აჩვენებს, ამ რეგიონს სერიოზული პრობლემები შეექმნება.
ვერ წარმომიდგენია, საერთაშორისო ინვესტორებმა საქსონია-ანჰალტში ახალი ბიზნესები წამოიწყონ და ქარხნები ააშენონ, თუკი რეგიონის პრემიერ-მინისტრი პარტია "ალტერნატივა გერმანიისთვის" წარმომადგენელი იქნება.
თუ ჩვენი შიშები გამართლდა, რეგიონი მნიშვნელოვნად დაზარალდება. სწორედ ამიტომ, საარჩევნო კამპანიის ბოლო დღეებში ყველაფერს გავაკეთებთ ამის თავიდან ასაცილებლად", - განაცხადა ფრიდრიხ მერცმა.
რუსთავი 2
წყარო: rustavi2.ge