ტრამპის ულტიმატუმი ზელენსკის და რუსეთ-უკრაინის ომში NATO-ს შესაძლო ჩართვა - ორი მთავარი საკითხი, რომელიც დღეს მსოფლიო მედიის ყურადღების ცენტრშია

ვაშინგტონმა კიევს ახალი პირობა წაუყენა - დონალდ ტრამპი ვოლოდიმირ ზელენსკის რუსეთის დიზელის მწარმოებელ ობიექტებზე დარტყმების შეჩერებისკენ მოუწოდებს. შტატების პრეზიდენტმა განმარტა, რომ იერიშები დიზელის საწვავის დეფიციტს და ტარიფების ზრდას განაპირობებს. თეთრი სახლის ლიდერის ინფორმაციით, ენერგოობიექტებზე თავდასხმების შეწყვეტის წინადადებას უკვე დათანხმდა უკრაინა, მოწოდება გაიზიარა რუსეთმაც.

ოფიციალური ვაშინგტონის კიდევ ერთი გზავნილი კიევმა ჯარედ კუშნერისგან მოისმინა. სამმხრივი მოლაპარაკებების აღდგენის პერსპექტივაზე საუბრისას, დონალდ ტრამპის სპეციალურმა წარმომადგენელმა განაცხადა, რომ უკრაინა ამ ეტაპზე უარს ამბობს რუსეთის მიერ მოთხოვნილი ტერიტორიების დათმობაზე, რაც, მისი შეფასებით, სამშვიდობო შეთანხმების მიღწევას აფერხებს.

ვლადიმერ პუტინთან შეხვედრის და პირისპირ მოლაპარაკებების წინადადებით გამოდის უკრაინის პრეზიდენტი. ვოლოდიმირ ზელენსკი აცხადებს, რომ მზადაა, რუსეთის პრეზიდენტს მაიამიში, "დიდი ოცეულის" დაგეგმილ სამიტზე შეხვდეს.

ცნობილია ოფიციალური მოსკოვის პოზიციაც - კრემლმა უკრაინის პრეზიდენტის ინიციატივა უარყო. ამასთან, პესკოვმა არ გამორიცხა, რომ აშშ-ის, რუსეთისა და უკრაინის მონაწილეობით, სამმხრივი შეხვედრა ოქტომბერში, აბუ-დაბიში გაიმართოს.

დიპლომატიური ძალისხმევის პარალელურად, რუსეთი უკრაინის ქალაქებსა და დასახლებებზე თავდასხმას განაგრძობს. სახანძრო-სამაშველო ოპერაციები მიმდინარეობს ჩერნიგოვის, სუმის, დონეცკის, დნიპროს, ოდესისა და კიევის ოლქებში.

საპასუხო იერიშებს ახორციელებს უკრაინაც. აფეთქებებია კრასნოდარის მხარეში, ბელგოროდის, ბრიანსკისა და კურსკის ოლქებში. იწვის ნავთობის გადამამუშავებელი ობიექტები და სასაწყობე ტერიტორიები.

რუსეთის მხრიდან ევროპული სახელმწიფოების მიმართ მიზანმიმართულ პროვოკაციებსა და საფრთხეზე საუბრობენ პოლონეთის, გერმანიის, NATO-ისა და ევროკავშირის ლიდერები. მედიაში გავრცელებული ინფორმაციით, რუსულმა ძალებმა, პოლონეთის საზღვართან, სამგზავრო მატარებელზე იერიში მიიტანეს. სამიზნე ის შემადგენლობა აღმოჩნდა, რომლითაც ევროპელი დიპლომატები და პოლიტიკოსები გადაადგილდებოდნენ.

პოლიტიკური განცხადებების პარალელურად, ინფორმაცია გაავრცელა პოლონეთის თავდაცვის სამინისტრომ. უწყების ცნობით, ბალტიის ზღვაში, პოლონეთის ქალაქ იაროსლავეცთან მდებარე სოფელ რუსინოვოს სანაპიროსთან, რუსული დრონი აღმოაჩინეს.

ავტორი: ლუკა ჩლაიძე